एजेन्सी – एक दिवसिय विश्वकप क्रिकेटमा आज बंगलादेश र दक्षिण अफ्रिका भिड्दै छन् । खेल नेपाली समय अनुसार दिउँसो ३:१५ देखि लन्डनमा सुरु हुनेछ ।

बंगलादेश पहिलो खेलमै विजयी सुरुवात गर्न चाहन्छ । पहिलो खेलमा इंग्ल्यान्डसँग १ सय ४ रनले पराजित भएको अफ्रिका पनि पहिलो जितको खोजिमा छ । यी दुवै टोली पहिलो पटक विश्वकप फाइनल पुग्ने दाउमा छन् । दुवै टोलीले विश्वकपमा सेमिफाईनल भन्दा माथिको यात्रा तय गर्न सकेका छैनन् । यी दुईबीच २० वान डे खेल हुँदा दक्षिण अफ्रिका १७ खेलमा विजयी भएको छ । ३ खेलमा पराजित भएको छ ।

बंगलादेशलाई चोटको चिन्ता छ । उसका ओपनर तामिम इकवाल, अलराउन्डर सकिब अल हसन, मुस्ताफिजुर रहमान, कप्तान मशरेफ मुर्तजा र महामदुल्लाह अभ्यासको क्रममा घाईते भएका छन् । आजको खेलमा सबै खेलाडी फिट नभएको खण्डमा बंगलादेशलाई ठूलो धक्का लाग्ने छ ।

बंगलादेश ब्याटिङमा इकवालसँगै, लिटन दास, सौम्य सरकार, मोहम्मद मिथुन, मुश्फिकुर रहिम, महामदुल्लाह र सकिबमा बढि निर्भर छ । मेहेदी हसन, मुस्ताफिजुर रहमान र कप्तान मुर्तजा उसका प्रमुख बलिङ हतियार हुन् ।

पहिलो खेलमा दक्षिण अफ्रिकाले बलिङ उत्कृष्ट गरेपनि ब्याटिङ कमजोर देखिएको थियो । ओपनर क्विन्टन डी कक र रस्सी भान डर डुसेन बाहेक अन्य खेलाडीको प्रर्दशन खराव थियो । दक्षिण अफ्रिकाले ब्याटिङ सुधार गर्नु पर्ने देखिन्छ ।

विश्वकप खेल्ने अफ्रिका पूर्ण टोली :
फाफ डु प्लेसिस (कप्तान), हसिम अमला, क्विन्टन डी कक, जेपी ड्युमिनी, एडेन मार्कराम, डेविड मिलर, लुन्गी निडी, क्रिस मोरिस, एन्डिले फेलुक्वायो, ड्वेन प्रिटोरियस, कागिसो रबाडा, तबरेज शम्सी, इमरान ताहिर, डेल स्टेन, रस्सि भान डर दुसेन ।

बंगलादेशको विश्वकप खेल्ने पूर्ण टोली :
मशरफे मुर्तजा (कप्तान), तमीम इकबाल, सौम्य सरकार, शब्बीर रहमान, रुबेल हुसैन, मुस्तफिजुर रहमान, अबु जायेद, महामदुल्लाह, मोहम्मद सैफुद्दीन, मोसद्दक हुसैन, शाकिब अल हसन, मेहेदी हसन, लिटन दास, मुश्फीकुर रहीम मोहम्मद मिथुन।