एजेन्सी – एकदिवसीय विश्वकप क्रिकेट अन्तर्गत शनिबार पहिलो खेलमा न्युजिल्यान्ड र श्रीलंकाबीच कार्डिफमा प्रतिस्पर्धा हुँदै छ । खेल नेपाली समय अनुसार दिउँसो ३:१५ देखी सुरु हुने छ ।

साविक उप विजेता न्युजिल्यान्ड कागजमा हेर्दा श्रीलंका भन्दा बलियो टोली हो । पछिल्लो दुई वर्षदेखि खराब प्रर्दशन गरिरहेको श्रीलंका त्यो सबै प्रर्दशन बिर्संदै विश्वकपमा उत्कृष्ट पुनरागमन गर्न चाहन्छ । श्रीलंकाले सन् १९९६ मा अष्ट्रेलियालाई ७ विकेटले हराउँदै विश्वकप जितेको थियो । सन् २००७ र २०११ मा श्रीलंका उपविजेतामा चित्त बुझायो ।

सन् २०१५ मा पहिलो पटक फाईनलमा पुगेको न्युजिल्यान्ड अष्ट्रेलियासँग ७ विकेट पराजित हुँदै उप विजेतामा सिमित रह्योे । न्युजिल्यान्ड पहिलो र श्रीलंका दोस्रो पटक विश्वकप जित्ने सोचमा छन् । वान डे विश्वकपमा यी दुईबीच १० खेल भएको छ । जसमा श्रीलंका ६ पटक विजयी हुँदा ४ पटक पराजित भएको छ ।

ओपनर मार्टिन गुप्टिल र कोलिन मुनरोले विष्फोटक ब्याटिङ गर्दै न्युजिल्यान्डलाई विशाल योगफल सम्म पुर्याउन सक्छन् । भरपर्दा तथा उत्कृष्ट लयमा रहेका कप्तान केन विलियम्सन, रोस टेलर, हेनरी निकोल्सले मध्यक्रमका बलिया हतियार हुन् । तीव्र गतिका बलर टेन्ट्र बोल्ट, टिम साउदी, ल्योकी फ्ग्युर्सन र म्याट हेनरीले इंग्ल्यान्डको मैदानमा राम्रो प्रभाव जमाउन सक्छन् । स्पिनरको रुपमा इश सोधी र मिचेल सान्टनर छन् । अलराउण्डर कोलिन डी ग्रान्डहोमले पनि खेल परिवर्तन गर्न सक्छन् ।

श्रीलंका अलराउण्डर थिसेरा परेरा, इसुरु उडाना, कुशल मेन्डिस प्रमुख हतियार हुन् । कप्तान दिमुथ कुरारत्ने, एन्जिलो मेन्थिज, धनन्जय डी शिल्भा, जीवन मेन्डिस, लाथिस मलिङ्गा र नुवान प्रदीपको प्रर्दशन श्रीलंकाको लागि विश्वकपमा निकै महत्वपूर्ण हुने छ ।