काठमाडौं (हाम्रो खेलकुद) – सशस्त्र प्रहरी बल (एपीएफ) तेस्रो संस्करणको प्रधानमन्त्री एक दिवसिय क्रिकेट प्रतियोगिताको सेमिफाइनलमा प्रवेश गरेको छ ।

शुक्रबार गण्डकी प्रदेशलाई ६ विकेटले हराउँदै लगातार तेस्रो जित निकालेसँगै एक खेल अगावै सेमिफाइनलमा प्रवेश गरेको हो । १ सय २६ रनको लक्ष्य एपीएफले २३ ओभरमा ४ विकेटको क्षतिमा पुरा गर्यो । एपीएफका लागि ओपनर शरद भेषवाकरले ५४ बलमा ४ चौका सहित ३५ रनमा अविजित रहँदै जित पक्का गरे । भेषवाकरले २३ ओभरको अन्तिम बलमा किशोर महतोलाई चौका हान्द्र खेल फिनिसिङ गरेका थिए । त्यस्तै कप्तान पृथु वास्कोटा ४ रनमा अविजित रहे ।

आशिफ शेख २०, प्रदीप ऐरी ३३, शंकर राना ३ रनमा आउट भए । १३ ओभरको अन्तिम बलमा दिपेश श्रेष्ठले विकेटकीपर आकाश थापाबाट क्याच गराउनु अघि ऐरीले ३० बलमा ५ चौका र १ छक्का प्रहार गरे । गण्डकी प्रदेशका लागि दिपेश श्रेष्ठले ३ र किशोर महतोले १ विकेट लिए ।

त्यसअघि निर्धारित समय भन्दा केहि ढिला सुरु भएको खेलमा ४३ ओभरमा झारिएको थियो । टस हारेर पहिला ब्याटिङ थालेको गण्डकी ४१.२ ओभरमा अल आउट हुँदै १ सय २५ रनमा समेटियो । गण्डकीका लागि दिपेश श्रेष्ठले सर्वाधिक २७ रनको योगदान दिए । ३९ ओभरको तेस्रो बलमा भुवन कार्कीले बोल्ड आउट गर्नु अघि उनले ३५ बलमा २ चौका प्रहार गरे ।

ओपनर अनिल गुरुङ ११,राहुल शर्मा १४,आकाश थापा १९,विपिन खत्री १७ र किशोर महतोले १५ रन बटुले । अन्यले राम्रो प्रर्दशन गर्न सकेनन् । एपीएफका भुवन कार्कीले ९ ओभरमा २ मेडन सहित २२ रन खर्चेर ३ विकेट लिए । त्यस्तै शरद भेषवाकर,अमरसिंह राउटेला र योज्ञमान कुमालले समान २ विकेट लिए । कमलसिंह ऐरीको नाममा १ विकेट रह्यो ।

एपीएफले अन्तिम खेल प्रदेश ५ सँग मुलपानी क्रिकेट मैदानमा आईतबार भिड्ने छ । अन्तिम खेलमा पराजित भएपनि एपीएफ समुह ए बाट शीर्ष दुईमा रहँदै सेमिफाईनल प्रवेश गर्ने छ ।