काठमाडौं (हाम्रो खेलकुद) – कप्तान पुष्प थापाले एक्लै ६ विकेट लिएपछि तेस्रो संस्करणको प्रधानमन्त्री एक दिवसिय क्रिकेट प्रतियोगितामा कर्णालीले प्रदेश १ सँग लज्जास्पद हार ब्योहोरेको छ । कर्णाली १ सय ८१ रनले पराजित भएको हो । २ सय २९ रनको लक्ष्य पछ्याएको कर्णाली २०.१ ओभरमा अल आउट हुँदै ४७ रनमा समेटियो ।

उसका लागि निश्चिल रावलले सर्वाधिक १७ रन बनाउन बाहेक अन्य कुनै पनि ब्याट्सम्यानले दोहोरो अंकमा रन जोड्न सकेनन् । प्रदेश १ को घातक बलिङ सामु कर्णालीका १० ब्याट्सम्यानले दोहोरो अंकमा रन छुन सकेनन् ।

प्रदेश १ लाई पहिलो जित दिलाउन कप्तान पुष्प थापाले ९.१ ओभरमा १ मेडन सहित १९ रन खर्चेर ६ विकेट लिए । त्यस्तै मुकुन्द यादव ३ र कमल खत्रीको नाममा १ विकेट रह्यो ।

त्यस अघि टियु क्रिकेट मैदानमा टस हारेर पहिला ब्याटिङकोे निम्तो पाएको प्रदेश १ ले निर्धारित ५० ओभरमा ८ विकेटका क्षतिमा २ सय २८ रन बनाएको थियो । उसका लागि सिद्धान्त लोहनीले सर्वाधिक ६३ रनको योगदान दिए । ४२ ओभरको दोस्रो बलमा रिटायर्ट हर्ट भएर पेभिलिएन फर्किनु अघि लोहनीले ९० बलमा ७ चौका प्रहार गरे । उनी खुट्टामा चोट लागेपछि मैदानबाट बाहिरिएका थिए ।

तल्लोक्रममा फिर्दोस अन्सारीले ३७ बलमा समान २ छक्का र चौका सहित ४५ रनमा अविजित रहँदै प्रदेश १ लाई बलियो योगफल सम्म पुर्याए । फिर्दोसले अन्तिम ओभरमा प्रकाश जैशीलाई २ चौका र १ छक्का सहित २० रन बटुलेका थिए । त्यस्तै ओपनर सन्नी पुनले ३४ रन बटुले । २४ ओभरको पहिलो बलमा ललित प्याकुरेलले बोल्ड आउट गर्नु अघि उनले ६३ बलमा ४ चौका प्रहार गरे ।

ओपनर राजन मगरले १६,मिनाष थापा १३,मुकुन्द यादव ३,श्रवन यादव २ रनमा आउट भए ।कप्तान पुष्प थापाले ४२ बलमा ५ चौका सहित २९ र दिपेश कडेलले ७ रनको योगदान दिए । कर्णालीका लागि प्रकाश जैशी,ललित प्याकुरेल र दिवान पुनले समान २ विकेट हात पारे । त्यस्तै महेश खत्री र सुदन पोखरेलको नाममा समान १ विकेट रह्यो ।