काठमाडौं (हाम्रो खेलकुद) – तेस्रो संस्करणको प्रधानमन्त्री एक दिवसिय क्रिकेट प्रतियोगितामा शुक्रबार टियू क्रिकेट मैदानमा भएको खेलमा प्रदेश १ ले कर्णाली प्रदेशलाई २ सय २९ रनको लक्ष्य दिएको छ ।

टस हारेर पहिला ब्याटिङकोे निम्तो पाएको प्रदेश १ ले निर्धारित ५० ओभरमा ८ विकेटका क्षतिमा २ सय २८ रन बनायो । उसका लागि सिद्धान्त लोहनीले सर्वाधिक ६३ रनको योगदान दिए । ४२ ओभरको दोस्रो बलमा रिटायर्ट हर्ट भएर पेभिलिएन फर्किनु अघि लोहनीले ९० बलमा ७ चौका प्रहार गरे । उनी खुट्टामा चोट लागेपछि मैदानबाट बाहिरिएका थिए ।

तल्लोक्रममा फिर्दोस अन्सारीले ३७ बलमा समान २ छक्का र चौका सहित ४५ रनमा अविजित रहँदै प्रदेश १ लाई बलियो योगफल सम्म पुर्याए । फिर्दोसले अन्तिम ओभरमा प्रकाश जैशीलाई २ चौका र १ छक्का सहित २० रन बटुलेका थिए । त्यस्तै ओपनर सन्नी पुनले ३४ रन बटुले । २४ ओभरको पहिलो बलमा ललित प्याकुरेलले बोल्ड आउट गर्नु अघि उनले ६३ बलमा ४ चौका प्रहार गरे ।

ओपनर राजन मगरले १६,मिनाष थापा १३,मुकुन्द यादव ३,श्रवन यादव २ रनमा आउट भए ।कप्तान पुष्प थापाले ४२ बलमा ५ चौका सहित २९ र दिपेश कडेलले ७ रनको योगदान दिए । कर्णालीका लागि प्रकाश जैशी,ललित प्याकुरेल र दिवान पुनले समान २ विकेट हात पारे । त्यस्तै महेश खत्री र सुदन पोखरेलको नाममा समान १ विकेट रह्यो ।