काठमाडौं (हाम्रो खेलकुद) – तेस्रो संस्करणको प्रधानमन्त्री राष्ट्रिय क्रिकेट प्रतियोगितामा बिहीबारको सुदुरपश्चिम र प्रदेश ५ बीचको खेल वर्षाको कारण रद्द भएको छ ।

१ सय ८९ रनको लक्ष्य पछ्याएको प्रदेश ५ ले १९ ओभरमा ४ विकेट गुमाउँदै ५६ रन बनाएको अवस्थामा पानी परेपछि दुबै टोलीले १-१ अंक बाँडेका छन् । पानी पर्नु अघि सुवेन्द्र पाण्डेले ५६ बलमा ४ चौका सहित २९ रन जोडे । ओपनर सन्दीप सुनार ३, अनुपम सिंह२ र निश्चल चौधरी ४ रनमा आउट भए । सुरोज दराल ८ र सौरभ खनाल ४ रनमा खेलि रहेको अवस्थामा वर्षा सुरु भएको थियो । सुदुरपश्चिमका लागि विनोद लामाले २,नरेन्द्र साउद र आकश चन्दले समान १ विकेट हात पारे ।

त्यसअघि कीर्तिपुर क्रिकेट मैदानमा टस जितेर पहिला ब्याटिङ थालेको सुदुरपश्चिमले ४९.५ ओभरमा १ सय ८८ रन बनाउन सबै विकेट गुमायो । उसका ओपनर खडक बोहोराले सर्वाधिक ६२ रनको योगदान दिए । ४० ओभरको चौथो बलमा रन आउट हुनुअघि उनले १ सय ७ बलमा ७ चौका र १ छक्का प्रहार गरे । नरेश बोहोराले ३१ रनको योगदान दिए । ४२ ओभरको पाँचौ बलमा कृष्ण कार्कीले सुवेन्दु पान्डेबाट क्याच आउट गराउनु अघि ५४ बलमा १ चौका प्रहार गरे ।

एक समय २४।४ ओभरमा ८१–५ को कमजोर अवस्थामा पुगेको सुदुरपश्चिमलाई छैटौं विकेटका लागि खड्क बोहोरा र नरेश बोहोराले ६० रनको साझेदारी गरेपछि प्रतिस्पर्धात्मक योगफल सम्म पुग्न सफल भएको हो । सुदुरपश्चिमका अन्य लोकेश बम ३० बलमा समान १ चौका र छक्का सहित १९,विपिन रावल ७, कप्तान शेर मल्ल ९,रोशन अधिकारी ४,बसन्त कार्की ६,आकाश चन्द ८ रनमा आउट भए । त्यस्तै नरेन्द्र साउदले २१ र विनोद लामाले ८ रन बटुले ।

सिद्धान्त शाही, कृष्ण कार्की र जितेन्द्र साहनीले समान २ विकेट लिए । सन्दीप सुनार,अनिल खरेल र विक्रम भुषालको नाममा समान १ विकेट रह्यो ।