काठमाडौं (हाम्रो खेलकुद) – चितवनमा धुर्मुस(सुन्तली फाउन्डेसनद्धारा निमार्णधिन गौतम बुद्ध अन्तराष्ट्रिय क्रिकेट रंगशाला तारबार स्थानिय समूहले बुधबार बिहान डोजर लगाएर भत्काइदिएका छन् ।

बाटोको माग गर्दै बुधबार बिहान करिब ६ बजेतिर झन्डै २ सय जना स्थानियको समुहले डोजर लगाएर बार भत्काएको धुर्मुस(सुन्तली फाउन्डेसनका अध्यक्ष सिताराम कट्टेल (धुर्मुस) ले जानकारी दिए । बार मंगलबारमात्रै लगाइएको थियो । बार भत्काएकोमा कट्टेल निकै भावुक रुपमा प्रस्तुत भए ।

‘केहि राजनीतिक शक्तिको आडमा नियोजित रुपमा जुन बार भत्काइएको छ । यो सबै भन्दा दुःखद घटना हो । सायद जीवनमा यो भन्दा कारुणिक घटना मैले देखेको थिएन । स्थानियकै सहमतिमा तारबार लगाएका थियौं । बाटो दिने सहमति पनि भएको हो,’ कट्टेलले हाम्रो खेलकुदलाई भने, ‘हामीलाई सहयोग गर्ने विदेशमा रहेका नेपाली पसिना माथिमा डोजर लगाईयो । पटक पटक स्थानियलाई राखेर कुरा गर्दै डिपिआर आएपछि बाटो दिने सहमति भएको थियो ।’

कट्टेलले खेलाडीका लागि रंगशाला निर्माण गर्न लागेको दोहोराउँदै भने, ‘हाम्रो लागि गर्न लागेका होइनौं । सम्बन्धित निकायले काम नगर्दा खेलाडी हाम्रै देशका सन्तती हुन् । ती खेलाडीको खुसीको लागि गर्न लागेका हौं । यहि ठाउँका स्थानियहरुको खुसी जोडिएको थियो । ‘

बाटोको कारण देखाउदै बार भत्काउन आवश्यक नरहेको कट्टेल बताउँछन् । उनले यसअघि पनि कमिनसको माग लगायत विभिन्न खाले दबाब र धम्की आउने गरेको सुनाए ।