काठमाडौं (हाम्रो खेलकुद) – काठमाडौंमा जारी तेस्रो संस्करणको प्रधानमन्त्री राष्ट्रिय एक दिवसिय क्रिकेट प्रतियोगिता अन्तर्गत टियू मैदानमा भएको खेलमा सुदूरपश्चिम प्रदेशले सशस्त्र प्रहरी बल (एपीएफ) लाई १ सय २६ रनको सामान्य लक्ष्य दिएको छ ।

टियू क्रिकेट मैदानमा भएको खेलमा टस जितेर पहिला ब्याटिङ थालेको सुदूरपश्चिम ३७.१ ओभरमा अल आउट हुँदै १ सय २५ रन समेटियो। उसका लागि लोकेश बलमे सर्वाधिक ३० रनको योगदान दिए । ३३ ओभरको चौथो बलमा अभिनास बोहोराले विकेटकीपर प्रदीप ऐरीबाट क्याच गराउनु अघि ५८ बलमा १ चौका प्रहार गरे । रनमा तालमेल गर्न नसक्दा सुदुरपश्चिमका ५ ब्याट्सम्यान रन आउट हुन पुगे ।

सुदुरपश्चिमका ओपनर विपिन रावल र खडक बोहोराले ९.३ ओभरमा ३१ रनको साझेदारी गर्दै मध्यम सुरुवात दिलाए । रन आउट हुनु अघि बोहोराले २२ बलमा ४ चौका सहित १९ रनको योगदान दिए । ओपनर रावललाई १५ ओभरको पाँचौ बलमा भुवन कार्कीले बोल्ड आउट गर्नु अघि ५१ बलमा २ चौका प्रहार गर्दै २१ रनको योगदान दिए ।

सुदुरपश्चिमको मध्य क्रममा निरन्तर विकेट पतन जारि रह्यो । रोशन अधिकारीले १९ बलमा २ चौका सहित १६,आकश चन्द ५,विनोद लामा ७ र नरेन साउद ५ रनमा आउट भए । २६.२ ओभरमा कप्तान शेर मल्ल रन आउट भएपछि सुदुरपश्चिम सस्तैमा समेटिन पुगेको हो।
एपीएफका लागि अभिनाष बोहोराले ९ ओभरमा १ मेडन सहित २९ खर्चेर २ विकेट लिए । पृथु बास्कोटा,शरद भेषवाकर र भुवन कार्कीको नाममा समान १ विकेट रह्यो ।