काठमाडौं (हाम्रो खेलकुद) – काठमाडौंमा जारी तेस्रो संस्करणको प्रधानमन्त्री राष्ट्रिय एक दिवसिय क्रिकेट प्रतियोगिता अन्तर्गत आईतबार टियु मैदानमा जारी खेलमा त्रिभुवन आर्मी क्लवले प्रदेश १ लाई २ सय ५ रनको लक्ष्य दिएको छ ।

टियू मैदानमा टस जितेर पहिला ब्याटिङ थालेको आर्मी ४५.३ ओभरमा अल आउट हुँदै २ सय ४ रनमा समेटियो । मध्यक्रमका राजेश पुलामी मगरले सर्वाधिक ५६ रनको अर्ध शतकिय इनिङ खेल्दै आर्मीलाई मध्यम योगफल सम्म युर्याए । ४६ ओभरको तेस्रो बलमा फिर्दोस अन्सारीले क्याच आउट गराउनु अघि ९३ बलमा ४ चौका प्रहार गरे ।

ओपनर राजु रिजाललाई आर्मीले चौथो ओभरको पहिलो बलमै ६ रनमा गुमाएको थियो । १० औं ओभरको अन्तिम बलमा मुकुन्द यादवले बोल्ड आउट गर्नु अघि अर्का ओपनर विनोद भण्डारीले ३४ बलमा ४ चौका र १ छक्का प्रहार गर्दै ३० रनको योगदान दिए । २२ ओभरको अन्तिम बलमा सिद्धान्त लोहनीले क्याच आउट गराउनु अघि हरि बहादुर चौहानले ५१ बलमा ४ चौका र १ छक्का प्रहर गर्दै ४१ रनको योगदान दिए । आर्मीको मध्यक्रमा निरन्तर विकेट गुम्न पुग्दा विशाल योगफल बनाउन चुकेको होे ।

भिम सार्की २,रोहित कुमार पौडेल ८,कुशल मल्ल १८ बलमा २ छक्का सहित १६ र करण केसी २६ रनमा आउट भए । करणलाई ४२ ओभरको पहिलो बलमा फिर्दोस अन्सारीले बोल्ड आउट गर्नु अघि ३० बलमा १ चौका र २ छक्का प्रहार गरे ।

जितेन्द्र मुखिया ८ र साहब आलम १ रनमा आउट भए । प्रदेश १ का लागि दिपेश कँडेलले सर्वाधिक ३ विकेट लिए । त्यस्तै सिद्धान्त लोहनी, फिर्दोस अन्सारी र मुकुन्द यादवले समान २ विकेट लिए । पुष्प थापाको नाममा १ विकेट रह्यो ।