एजेन्सी – पुर्व कप्तान स्टिभ स्मिथको शतकसँगै विश्वकप वार्मअप खेलमा अस्ट्रेलियाले इंग्ल्यान्डलाई १२ रनले पराजित गरेको छ । शनिवार राति सम्पन्न रोमान्चक खेलमा अस्ट्रेलिया१२ रनले विजयी भएको हो ।

इंग्ल्यान्डलाई जितको लागि अन्तिम ओभरमा १५ रनम चाहिएको थियो । मार्कस स्टोइनिसले पहिलो बलमै लियाम प्लन्केटलाई ग्लेन म्याक्सवेलबाट क्याच आउट गराउदै जित सहज बनाए । दोस्रो बलमा १ रन दिदा तेस्रो बलमा जोफ्रा आर्चर दुई रन लिने क्रममा रन आउट भएपछि अष्टे«लिया विजयी भएको हो ।

२ सय ९८ रनको लक्ष्य पछ्याएको इंग्ल्यान्ड ४९.३ ओभरमा अल आउट हुँदै २ सय ८५ रनमा समेटियो ।
इंग्ल्यान्डका लागि मध्यक्रमका जेम्स भिन्सले ७६ बलमा ५ चौका सहित सर्वाधिक ६४ रनको योगदान दिए । भिन्सलाई ३४ ओभरको पाँचौ बलमा जेसन बेहरनडर्फले नाथल लायनबाट क्याच आउट गराए ।

कार्यवाहक कप्तान जस बटलरले ३१ बलमा ५ चौका र ३ छक्का प्रहार गर्दै आक्रमक ५२ रन बटुले । आक्रमक रुपमा प्रस्तुत भएका बटलरलाई २९ ओभरको अन्तिम बलमा नाथन कुल्टर नाईलले उस्मान खवाजाबाट क्याच आउट गराएपछि इंग्ल्यान्ड दबाबमा परेको थियो ।

ओपनर जोसन रोयले ३७ बलमा ४ चौका सहित ३२,जोनी बेयरस्ट्रो १२,बेन स्ट्रोक्स २०,टम कुुरन र मइन अली २२ रनमा आउट भए । क्रिस वोक्स ४० रनमा आउट भए । ४८ ओभरको दोस्रो बलमा रन आउट हुनुअघि उनले ४४ बलमा ३ चौका प्रहार गरे ।

अष्टे«लियाका लागि जेसन बेहरनडर्फ र केन रिचड्सनले समान २ विकेट लिए । त्यस्तै नाथन लायन,एडम जम्पा,मार्कस स्टोइनिस र नाथन कुल्टर नाईलले समान १ विकेट लिए ।

त्यस अघि साउथह्याम्पटनमा टस हारेर ब्याटिङ थालेको अष्ट्रेलियाले निर्धारित ५० ओभरमा ९ विकेट गुमाउँदै २सय ९७ रन बनाएको थियो। अष्ट्रेलियालाई बलियो योगफल सम्म पुर्याउन स्टिभ स्मिथले १ सय १६ रनको महत्वपूर्ण इनिङ खेले । अन्तिम ओभरको चौथो बलमा टम कुरनले क्याच आउट गर्नु अघि स्मिथले १ सय २ बलमा ८ चौका र ३ छक्का प्रहार गरे ।

ओपनर डेविड वार्नरले ५५ बलमा ५ चौका सहित ४३, आरोन फिन्च १४, शन मार्श ३०, मार्कश स्टोइनिस १३, उस्मान खवाजा ३१ र एलेक्स करीले ३० रनको योगदान दिए । इंग्ल्यान्डका तीव्र गतिका बलर लियाम प्लन्केटले ९ ओभरमा ६९ रन खर्चेर ४ विकेट लिए । मार्क उड,टक कुरन र लियाम डसनले समान १ विकेट हात पारे ।