सुबास हुमागाईं, काठमाडौं

राष्ट्रिय टोलीका कप्तान पारस खड्का र उपकप्तान ज्ञानेन्द्र मल्ल शनिबार प्रधानमन्त्री कप एकदिवसीय राष्ट्रिय क्रिकेट प्रतियोगितामा प्रदेश ३ को जर्सीमा उत्रिए । राष्ट्रिय टोलीका लगभग सबै खेलाडी विभागीय टोलीबाट खेल्दा पारस र ज्ञानेन्द्रले भने प्रदेशबाट खेल्ने निर्णय गरे । पहिलो खेलमा दुवै खेलाडीको प्रदर्शन राम्रो पनि रहयो ।

दुवै ज्ञानेन्द्र र पारसले बलिङ र ब्याटिङमा टोलीका लागि प्रभावशाली प्रदर्शन गरे । कप्तान पारसले ब्याटिङतर्फ ४६ रन जोड्दै १ विकेट लिए । ज्ञानेन्द्रले ब्याटिङतर्फ १ सय १७ रनको उत्कृष्ट इनिङ खेलेपनि टोलीलाई जितसम्म पुर्याउन भने सकेनन् । दुवै खेलाडीले आफ्नो भूमिका कुशलतापूर्वक निर्वाह गर्दा अन्य खेलाडीको साथ भने अपेक्षित रुपमा पाउन नसक्दा जितसम्म पुग्न असमर्थ रहे ।

प्रदेश ३ मा उमेर समूहमा नेपालको प्रतिनिधित्व गरेका खेलाडीको बाहुल्यता रहेको छ । बलिङतर्फ नन्दन यादव र सूर्य तामाङ तथा ब्याटिङमा रित गौतम, जितेन्द्रसिंह ठकुरी, अभिषेक बस्नेत र इशान पाण्डे नेपालले निकै आशा गरेका प्रतिभा हुन् । अन्य खेलाडीमा घरेलु क्रिकेटमा आक्रामक ब्याट्सम्यानका छवी बनाएका सोनु तामाङ छन् । रविन जोशी र सोनु देवकोटाले पनि घरेलु क्रिकेटमा खेल्दै आएका छन् । प्रदेश ३ को बेन्चमा युवा आदील खान, प्रतिस जिसी र गौतम केसी छन् । वैकल्पिकमा नाम रहेका दीपक बोहोराले पनि यू-१६ उमेर समूहमा प्रभाव जमाएका छन् ।

एपीएफविरुद्ध नन्दनले बलिङतर्फ उत्कृष्ट प्रदर्शन गरे । कप्तम पारस खड्काले खेलपछि नन्दनको बलिङको प्रशंसा पनि गरे । नन्दनले १० ओभरमा २ मेडनसहित ४० रन खर्चेर ३ विकेट हात पारे । ब्याटिङतर्फ ओपनरद्वय रित र जितेन्द्रले केहि सुस्त गतिमा खेलेपनि एपीएफका तीव्र गतिका बलरलाई सुरुवाती समयमा विकेट दिएनन् । १२ औं ओभरमा जितेन्द्र एलबीडब्लु धरापमा पर्नुअघि यी दुईले ४० रनको साझेदारी गरे ।

कप्तान ज्ञानेन्द्र मल्लले खेलपछि बोल्दै लामो समयपछि मैदानमा फर्कन पाउँदा खुसी लागेको बताए । ‘ लामो समयपछि मैदान फर्कन पाउँदा खुसी लागेको छ । विगत केहि महिना पारिवारिक कारणले क्रिकेटमा समय दिन सकेको थिईन । सुरुमा त खेलमा जम्न समय लाग्यो । त्यसपछि ब्याटिङ त राम्रो रहयो तर नतिजा भने आएन । सुरुवातबाट नै खेलमा पकड जमाउन नसक्दा नतिजा आफ्नो पक्षमा आएन’, उनले भने ।

ज्ञानेन्द्रले कप्तान पारससँगको साझेदारी लामो समय नटिक्नु खेलको टर्निङ पोइन्ट भएको बताए । ‘ पारस र ममाथि ब्याटिङको धेरै जिम्मेवारी रहेको थियो । हामीले कम्तिमा ४० ओभरसम्म बस्नुपर्ने थियो । पारसको खेल्ने शैलीमा हामीले बाउन्ड्रीको चिन्ता लिनुपर्ने थिएन । पारसको विकेट जानु धेरै घाटा भयो,’ उनले भने ।

पारस र ज्ञानेन्द्रले दुवै प्रदेश ३ बाट खेल्ने निर्णय प्रदेशको क्रिकेट बलियो बनाउने लक्ष्य राखेको बताए । ‘ हाम्रो लक्ष्य भनेको प्रदेशलाई कसरि बलियो बनाउनुपर्छ भन्ने हो । प्रदेशमा पनि प्रतिभा धेरै छन् । युवा खेलाडीहरु अहिले टोलीमा पनि छन् । हामीले राम्रो आधार बनाउँदै जाने हो भने राष्ट्रिय टोलीको लागि पनि भविष्यमा सहयोग पुग्ने छ । हाम्रो अहिलेको लक्ष्य भनेको हामीले सिकेको कुरा प्रदेशका आउने खेलाडीमा पुर्याउनु पर्छ भन्ने हो,’ ज्ञानेन्द्रले थपे ।

प्रदेश ३ ले प्रतियोगिताको दोस्रो खेलमा सोमबार प्रदेश ५ सँग मुलपानी रंगशालामा खेल्नेछ । पहिलो खेलमा ज्ञानेन्द्र र पारसको भरमा नै देखिएको प्रदेश ३ का अन्य खेलाडीले प्रादेशिक टोलीविरुद्ध भने नतिजामुखी प्रदर्शन गर्ने अपेक्षा राखिएको छ । उमेर समूहका प्रतियोगितामा आफूलाई सिद्ध गरेका यी खेलाडी सिनियर क्रिकेटमा बामे सर्दै गर्दा पारस र ज्ञानेन्द्रको साथ् र सहयोगले अहम भूमिका खेल्ने पक्का छ ।

एपीएफविरुद्ध शतक बनाएपछि ज्ञानेन्द्र मल्लसँग लिएको अन्तर्वार्ता