काठमाडौं (हाम्रो खेलकुद) – प्रदेश ३ का उपकप्तान ज्ञानेन्द्र मल्ले तेस्रो संस्करणको प्रधानमन्त्री राष्ट्रिय एक दिवसिय क्रिकेट प्रतियोगितामा सानदार शतक प्रहार गरेका छन् ।

शनिबार एपीएफविरुद्ध लिग चरणको पहिलो खेलमा ज्ञानेन्द्रले शतक प्रहार गरेका हुन् । ४८ औं ओभरको पाँचौ बलमा चौका प्रहार गर्दै शतक पुरा गरे । मल्लले १ सय २ बलमा ७ चौका र ४ छक्का प्रहार गर्दै १ सय २ रनमा खेलि रहेका छन् ।

२ सय ८९ रनको विशाल लक्ष्य पछ्याएको प्रदेश तीनले ४६.५ ओभरमा २ सय २८ रन बनाउन ७ विकेट गुमाएको छ । कप्तान पारस खड्का ४६ रनमा आउट भई सकेका छन् । भुवन कार्कीको २९ ओभरको पाँचौ बलमा ठूलो शट खेल्ने धुनमा सुमित महर्जनबाट क्याच आउट हुनु अघि पारसले ४५ बलमा ४ चौका र २ छक्का प्रहार गरे ।

पहिलो विकेटका लागि ओपनर रित गौतम र जितेन्द्र सिंह ठकुरीले ११.५ ओभरमा ४० रनको साझेदारी गर्दै मध्यम सुरुवात दिलाएका थिए । पृथु बास्कोटाले ठकुरीलाई एलवी डब्लू आउट गर्दै १२ रनमा पेभिलिएन फर्काए । १३ ओभरको पाँचौ बलमा रित २७ रनमा रन आउट भए । रन आउट हुनुअघि उनले ५२ बलमा ४ चौका प्रहार गरे । अभिषेक बस्नेत ९,रविन जोशी २,सोनु तामाङ ४ रनमा आउट भए । एपीएफका कमल सिंह ऐरीले ३, पृथु बास्कोटा,अभिनाष बोहोरा र भुवन कार्कीले समान १ विकेट लिए ।