काठमाडौं (हाम्रो खेलकुद) – तेस्रो संस्करणको प्रधानमन्त्री कप एकदिवसिय राष्ट्रिय क्रिकेट प्रतियोगिता आज देखी काठमाडौंमा सुरु हुँदैछ ।

कीर्तिपूर क्रिकेट मैदान टियूमा त्रिभुवन आर्मी क्लव र प्रदेश २ बीच उद्धघाटन खेल हुने हुने छ । खेल विहान ९ बजेपछि सुरु हुने छ । त्यस्तै आज मुलपानी मैदानमा हुने भनिएको प्रदेश १ र नेपाल पुलिसबीचको खेल नहुने भएको छ । मैदान पूर्ण रुपमा तयार नहुँदा जेठ १२ गतेबाट पछि मात्र मुलपानीमा खेल हुने आयोजकले जनाएको छ ।

आर्मी विनोद भण्डारी र प्रदेश २ महबुब आलमको कप्तानीमा मैदान उत्रने छन् । राष्टिय खेलाडीको बाहुल्यता रहेको आर्मीमा विनोदसँगै सोमपाल कामी, जितेन्द्र मुखिया, रोहित कुमार पौडेल, करण केसी, भिम सार्की, कुशल मल्ल, हरि बहादुर चौहान लगायतका खेलाडी छन् । हासिम अन्सारी, महबुब आलम, राशिद खान, हरिशंकर शाह, साम्शद शेख प्रदेश २ का मुख्य हतियार हुन् ।

प्रतियोगितामा ७ प्रदेश र तीन विभागिय गरि १० टोलीको सहभागिता छ । समुह ए मा एपीएफ,प्रदेश ५,प्रदेश ३,सुदुरपश्चिम र गण्डकी रहेका छन् । समुह बी मा त्रिभुवन आर्मी,नेपाल पुलिस,प्रदेश २,प्रदेश १ र कर्णाली प्रदेश रहेका छन् । राउन्ड रोविन लिग पछि समूहका शीर्ष २ टोली सेमिफाइनल पुग्नेछन् । सेमिफाईनल खेल जेठ २२ र २३ गते हुने छ । २४ गते रेष्ट हुँदा २५ गते फाईनल हुने छ ।

विजेताले उपाधिसहित २० लाख रुपैयाँ प्राप्त गर्ने छ । दोस्रो हुने टोलीले १० लाख रुपैयाँ पाउनेछ । प्रतियोगिताकै उत्कृष्ट खेलाडीले मोटर साइकल पाउने छन् । त्यस्तै उत्कृष्ट ब्याट्सम्यान र बलरले समान ५० हजार प्राप्त गर्ने छन् । एक हातले क्याच लिउने दर्शकले रु ५० हजार पाउने छन् ।