एजेन्सी – विश्वकप सुरु हुन एक साता बाँकी रहेको अवस्थामा अष्ट्रेलियाले अभ्यास खेलमा वेस्ट इन्डिजलाई ७ विकेटले पराजित गरेको छ ।

टस हारेर पहिला ब्याटिङ थालेको वेस्ट इन्डिज ४६.२ ओभरमा अल आउट हुँदै २ सय २९ रनमा समेटिएको थियो । वेस्ट इन्डिजका मिडिल अडरमा कार्लोस वर्थवेटले सर्वाधिक ६० रन बटुले । उनले ६४ बलमा ५ चौका र ३ छक्का प्रहार गरेका थिए ।

त्यस्तै ओपनर इभिन लुईसले ५६ बलमा ६ चौका र १ छक्का प्रहार गर्दै ५० रनको योगदान दिए । शाई होप २१, सुनिल एम्ब्रीस ३७, फेविन एलिनले १२ रन जोड्न बाहेक अन्यले राम्रो प्रर्दशन गर्न सकेनन् । अष्ट्रेलियाका मिचेल स्टार्क,ग्लेन म्याक्सवेल,प्याट कमिन्स र नाथन कुल्टन नाईलले समान २ विकेट लिए । त्यस्तै एडम जम्पा र जेसन बेहरनडर्फको नाममा समान १ विकेट रह्यो ।

२ सय ३० रनको लक्ष्य अष्ट्रेलियाले ३८.३ ओभरमा ३ विकेटको क्षतिमा पुरा गर्यो । अष्ट्रेलियाको सहज जितमा स्टिभ स्मिथले ८२ बलमा ७ चौका र २ छक्का प्रहार गर्दै ७६ रनको योगदान दिए । त्यस्तै कप्तान आरोन फिन्च ४२ र डेविड वार्नर १२ रनमा आउट हुँदा शन मार्श ५५ र ग्लेन म्याक्सवेल १८ रनमा अविजित रहे । वेस्ट इन्डिजका ओशन थोमस र कार्लोस बर्थवेटले समान १ विकेट हात पारे ।

यस अभ्यास खेलको क्रममा अष्ट्रेलियाका शीर्षक्रमका ब्याट्सम्यान उस्मान खवाजा घाइते हुन पुगेका छन् । अष्ट्रेलियाले  विश्वकप अघि २५ मे मा इंग्ल्यान्ड र २७ मे मा श्रीलंकासँग अभ्यास खेल खेल्ने छ । विश्वकपमा अष्ट्रेलियाले पहिलो खेल जुन १ मा अफगानिस्तानसँग खेल्दै सुरुवात गर्ने छ ।