एजेन्सी – एकदिवसिय विश्वकप सुरु हुन ९ दिन बाँकी रहेको अवस्थामा घरेलु टोली इंग्ल्यान्डले यस अघि घोषणा गरेका १५ सदस्यीय टोलीमा ३ खेलाडी परिवर्तन गरेको छ ।

गत महिना घोषणा गरेको टोलीमा ३ परिवर्तन गरेको क्रिकेट इंग्ल्यान्डले जनाएको छ । तीव्र गतिका युवा बलर जोफ्रा आर्चर, शीर्षक्रमका ब्याट्सम्यान जेम्स भिन्स र लियाम डसनलाई टोलीमा मौका दिइएको छ । यी तीन खेलाडीलाई एलेक्स हेल्स, डेविड विल्ली र जो डेनलीको स्थानमा मौका दिइएको हो ।

एकदिन अघि पाकिस्तानसँगको पाँच ओडीआई सिरिज ४-० ले जितेपछि इंग्ल्यान्डले अन्तिम टोली घोषणा गरेको हो । आर्चरले पाकिस्तानसँगको ओडीआई सिरिजमै इंग्ल्यान्डबाट डेब्यू गरेका थिए । ३ मे मा इंग्ल्यान्डको टोलीमा डेब्यू गरेको १८ दिनमै आर्चरले विश्वकपमा स्थान पाएका छन् । जेम्स भिन्स र लियाम डसन पनि उत्कृष्ट प्रर्दशन गर्दै आएका छन् ।

आईसीसी वान डे वरियताको शीर्षस्थानमा रहेको इंग्ल्यान्डलाई यस पटक उपाधिको दाबेदार टोली मानिएको छ । विश्वकप मे ३० देखि जुलाई १४ सम्म आयोजना हुनेछ । इंग्ल्यान्डले मे ३० मा दक्षिण अफ्रिकासँग खेल्दै विश्वकपको सुरुवात गर्ने छ ।

विश्वकप खेल्ने अन्तिम इंग्ल्यान्डको १५ सदस्य टोली :
१.इओन मोर्गन (कप्तान)
२.मोईन अली
३.जोनी बयरस्ट्रो
४.जस बटलर
५.टम करन
६.जोफ्रा आर्चर
७.जेम्स भिन्स
८.लियाम प्लन्केट
९.आदिल रासिद
१०.जो रुट
११.जोसन रोय
१२.बेन स्ट्रोक्स
१३.लियाम डसन
१४.क्रिस वोक्स
१५.मार्क वुड