काठमाडौं (हाम्रो खेलकुद)– प्रधानमन्त्री कप महिला टि ट्वान्टी क्रिकेट प्रतियोगिताको चौथो संस्करण यसै महिनाको अन्तिम साता महेन्द्रनगरमा हुने भएको छ ।

राष्ट्रिय खेलकुद परिषद् (राखेप) को आयोजना तथा महाकाली स्पोर्टस् सोसाइटीको व्यवस्थापनमा प्रतियोगिता जेठ २८ गते सुरु हुने काठमाडौंमा मंगलबार आयोजित पत्रकार सम्मेलनमा राखेप सदस्य सचिव केशव विष्टले जानकारी दिएका थिए ।

प्रतियोगितामा एक विभागिय टोली नेपाल एपिएफ र ७ प्रदेश सहित ८ टोलीको सहभागिता रहने छ । महेन्द्रनगरको खुल्ला मञ्चमा हुने प्रतियोगिताको विजेताले ५ लाख र दोस्रो हुने टोलीले ३ लाख रुपैँया प्राप्त गर्ने छन् ।

प्रतियोगिता आयोजना गर्न करिब ८८ लाख लाग्ने महाकाली स्पोर्टस् सोसाईटीका अध्यक्ष सुमन भट्टले बताएका छन् । राखेपले ३५ लाख रुपैया उपलब्ध गराउने र नपुग रकम प्रायोजनमार्फत जुटाइने भट्टले जानकारी दिए । प्राइम टेलिभिजनले प्रतियोगिताको प्रत्यक्ष प्रसारण गर्ने बताइएको छ ।
…..
प्रधानमन्त्री कप र एनसीएल वुमेन्स टि ट्वान्टी प्रतियोगिताको मिति जुध्ने भएको छ । एनसीएल वेमेन्स टि ट्वान्टीको आयोजक एनसीएल स्पोर्टस् प्रालीले राखेपसँग समन्वय नगरेकोले त्यसका बारेमा जानकारी नभएको सदस्य सचिव विष्टले बताए ।

‘उहाँहरुले कुन मितिमा प्रतियोगिता गर्दै हुनुहन्छ भन्ने केहि जानकारी छैन, सदस्य सचिव विष्टले भने,‘ यो अवस्थामा हामीले जेठ २८ देखि राष्ट्रिय महिला टी ट्वान्टी प्रतियोगिता सञ्चालन गर्नेछौं । ’

यद्दपी, एनसिएल स्पोट्र्स प्रालिले राखेपको समन्वयमा वोमेन्स टि २० लिग क्रिकेट जेठ २४ गते दिन ३० गते सम्म कीर्तिपुर स्थित टियु क्रिकेट मैदानमा सन्चालन गर्ने घोषणा गरेको थियो । तर, प्रतियोगिताको यसअघि दुई पटक सरिसकेको छ ।