एजेन्सी – हरेक क्रिकेट खेलाडीको सपना आफ्नो देशबाट विश्वकप खेल्ने हुन्छ । जब विश्वकपमा आफ्नो नाम परेको थाहा हुन्छ सायद त्यो दिन उक्त खेलाडीलाई जीवकै सबैभन्दा ठूलो खुसिको क्षण हुने गर्दछ । तर पाकिस्तानी युवा अलराउन्डर आशिफ अलीलाई भने विश्वकपमा परेको अघिल्लो दिन पुत्रीशोक परेको छ ।

अली पाकिस्तानको विश्वकप टोलीमा पर्नु अघि उनको १९ महिने छोरीको क्यान्सरको कारण निधन भएको छ । जसको कारण अली विश्वकप टोलीमा परे पनि खुसी हुन सकेनन् । आईतबार राती आशिफ अलीको छोरी नुर तातिमाको अमेरिकामा क्यान्सरको कारण निधन भएको थियो ।

छोरीको निधनको कारण दुखद घढीमा रई रहेका बेला उनि पाकिस्तानको विश्वकप खेल्ने टोलीमा परे । पाकिस्तान क्रिकेट बोर्डले फहिम असरफको स्थानमा उनलाई टोलीमा मौका दिएको थियो । पाकिस्तानले सोमबार मोहम्मद आमिर, आशिफ अली र वहाब रियाजलाई टोलीमा मौका दिएको थियो । आबिद अली,जुनैद खान र फहिम असरार्फको स्थानमा यी तीन खेलाडीलाई मौका पाएका हुन् ।

पाकिस्तान बोर्डले आसिफलाई अमेरिका जानुपरेको अवस्थामा जान दिने बताएको छ । मुख्य छनोटकर्ता इन्जमाम उल हकले उनले वार्मअप खेल मात्र नभएर प्रतियोगिताको केहि खेल उनले गुमाउने अवस्था आएपनि उनलाई टोलीमा राखेरै छुट्टि दिने बताए ।

अलीले अघिल्लो वर्षमात्र पाकिस्तानको सिनियर टिममा डेब्यू गरेका थिए । सन् २०१८ जुलाई १३ मा जिम्बाबेविरुद्ध डेब्यू गरेका थिए । अलीले आइतबार राती सम्पन्न इंग्ल्यान्डसँगको पाँच ओडीआई सिरिजमा उत्कृष्ट प्रर्दशन गरेपछि विश्वकपमा मौका पाएका हुन् । अलराउन्डर अली तल्लो क्रममा ठूलो शट प्रहार गर्न माहिर हुँदा मध्यम गतिमा बलिङ गर्ने गर्दछन् ।

अलीले त्यस अघि सन् २०१७ मा नेपालको सर्वाधिक लोकप्रिय फ्रेन्चाइज लिग एभरेष्ट प्रिमियर लिग (ईपीएल) मा पोखरा राईनोजबाट खेलेका थिए । अलीले पाकिस्तानबाट १६ खेलमा १२ इनिङ्समा ब्याटिङ गर्दै कुल ३ सय ४२ रन बनाएका छन् ।