एजेन्सी – इंग्ल्यान्ड र वेल्समा ३० मे देखि वान डे विश्वकप सुरु हुँदैछ । अब अभ्यासको लागि केहि दिनमै सबै टोली इंग्ल्यान्ड पुगिसक्ने छन् । विश्वकप कसले जित्ला भन्ने समर्थकमा चर्चा चलिसकेको छ ।

भारतीय टिमका ओपनर रोहित शर्मा र कप्तान विराट कोहलीको नाममा थुप्रै विश्व रेकर्ड छन् । रोहितले एकदिवसिय क्रिकेटमा ३ पटक दोहोरो शतक प्रहार गर्ने देखी एकै इनिङमा २ सय ६४ रन बनाउने जस्ता दुर्लभ रेकर्ड कायम गरेका छन् । त्यस्तै कप्तान विराट कोहलीको नाममा सर्वाधिक छिटो दश हजार पुरा गर्ने देखी थुप्रै रेकर्ड छन् । विश्वकपमा थुप्रै रेकर्ड बन्ने र तोडिने गर्दछन् । हरेक खेलाडी आफ्नो नाममा नयाँ रेकर्ड बनाउन चाहान्छन् ।

त्यस्तै यो विश्वकपमा रोहित शर्मा र विराट कोहलीले भारतीय टोलीका पुर्व कप्तान सौरव गांगुलीको २० वर्षे पुरानो रेकर्ड तोड्ने प्रयास गर्ने छन् । गांगुलीले सन् १९९९ को विश्वकपमा श्रींलकाविरुद्ध १ सय ८३ रन बनाएका थिए । भारतीय ब्याट्सम्यानले विश्वकपमा बनाएको यो सर्वाधिक उच्च स्कोर हो ।

जुन रेकर्ड यो पटक रोहित शर्मा र कप्तान विराट कोहलीले तोड्न सक्छन् । यी दुबै खेलाडीले ठूलो इनिङ खेल्न सक्छन् । इंग्ल्यान्डको मैदान ब्याटिङलाई साथ मिल्ने गर्दछ । इंग्ल्यान्डको मैदानमा ३ सय ५० रनको लक्ष्य पनि सुरक्षित मानिदैन । भारतीय टोलीबाट निरन्तर उत्कृष्ट प्रर्दशन गर्दै आएका रोहित र कोहलीले यो विश्वकपमा गांगुलीको रेकर्ड तोड्न सक्छन् । तर सहज भने देखिदैन । यी दुवै खेलाडी लयमा आउदा विपक्षीका जो सुकै बलरलाई रोक्न निकै कठिन हुने गर्दछ ।

विरेन्द्र सहवागले सन् २०११ को विश्वकपमा बंगलादेशविरुद्ध १ सय ७५ रन बनाउँदै रेकर्ड नजिक पुगेका थिए । तर तोड्न सकेनन् । रोहितको विश्वकपमा सर्वाधिक उच्च प्रर्दशन १ सय ३७ रहेको छ । जुन सन् २०१५ मा बंगलादेशविरुद्ध प्रहार गरेका थिए । त्यस्तै विराट कोहलीको विश्वकपमा सर्वोच्च स्कोर सन् २०१५ मा पाकिस्तानबीरुद्ध १ सय ७ रन रहेको छ ।

विश्वकपमा हाल सम्म क्रिस गेल र मार्टिन गुप्टिलले मात्र दोहोरो शतक प्रहार गरेका छन् । गुप्टिलले सन् २०१५ को विश्वकपमा वेस्ट इन्डिजविरुद्ध २ सय ३७ रनको अविजित पाली खेलेका थिए । यो नै विश्वकपमा कुनै पनि खेलाडीले प्रहर गरेको उच्च स्कोर हो । त्यस्तै वेस्ट इन्डिजका ओपनर तथा विश्फोटक ब्याट्सम्यान क्रिस गेलले सन् २०१५ को विश्वकपमै जिम्वाब्बेविरुद्ध २ सय १५ रन प्रहार गरेका थिए ।