काठमाडौं (हाम्रो खेलकुद) – पहिलो संस्करणको व्ह्विलचियर एसिया कप टी ट्वान्टी प्रतियोगिताको उपाधि पाकिस्तानले जितेको छ । शनिवार टियु क्रिकेट मैदानमा भएको फाईनल खेलमा भारतलाई ५ विकेटले हराउँदै पाकिस्तानले उपाधि जित्न सफल भएको हो ।

विजेता पाकिस्तानले ६० हजार प्राप्त गर्न उप विजेता भारतले ३० हजारमा चित्त बुझाउनु पर्यो । २ सय ११ रनको विजयी लक्ष्य पछ्याएको पाकिस्तानले १९.३ ओभरमा ५ विकेट गुमाएर पुरा गर्यो ।

पाकिस्तानका लागि मोहम्मद लातिफले ६८ बलमा २७ चौका र ५ छक्का प्रहार गर्दै १ सय ५६ रनमा अविजित रहे । त्यस्तै मोहम्मद फायज र सायद अहमिदले समान १५ रनको योगदान दिए । भारतका सौरभ मालिकले २ विकेट हात पारे ।

त्यस अघि टस जितेर पहिला ब्याटिङ थालेको भारतले निर्धारित २० ओभरमा २ विकेट गुमाउँदै २ सय १० रन बनाएको थियो । भारतका लागि सौरभ मालिकले ६२ बलमा १९ चौका र १ छक्का प्रहार गर्दै १ सय ४ तथा निखुल प्रजापतीले ६३ रनको योगदान दिए । पाकिस्तानका मोहम्मद तालिफ म्यान अफ द सिरिज घोािषत भए ।