काठमाडौं (हाम्रो खेलकुद)– आयोजक नेपाल काठमाडौंमा जारी ह्विलचियर एसिया कप टी ट्वान्टी क्रिकेट प्रतियोगितामा समूह चरणका सबै तीन खेलमा हार बेहोर्दै बाहिरिएको छ । नेपाली टोली शुक्रबार पाकिस्तानसँग १ सय ३० रनले पराजित भएको थियो ।

२ सय ७० रनको लक्ष्य पछ्याएको नेपालले निर्धारित २० ओभरमा ६ विकेट गुमाउँदै १ सय ३९ रन बनायो । नेपालका लागि कप्तान दिगम सिंह चेमजोङले सर्वाधिक ४७ रन बनाए । त्यस्तै सागर पान्डेले ३० रन जोडे । पाकिस्तानका मोहम्मद फिवाजले २ विकेट लिए ।

त्यस अघि पहिला ब्याटिङ थालेको पाकिस्तानले निर्धारित २० ओभरमा ४ विकेट गुमाउँदै २ सय ६९ रन जोडेको थियो । उसका लागि मोहम्मद लातिफले ५५ बलमा २३ चौका र ६ छक्का प्रहार गर्दै १ सय ४८ रनको बिस्फोटक इनिङ्स खेले ।

त्यस्तै साजिद अली अब्बासीले ६२ रन जोडे । नेपालका डम्बर मगर र यम बहादु श्रेष्ठले समान १ विकेट हात पारे । यस अघि नेपाल भारत र बंगलादेशसँग पनि फराकिलो अन्तरले पराजित भएको थियो ।