एजेन्सी – त्रिकोणात्मक सिरिज अन्तर्गत वेस्ट इन्डिजसँगको खेलमा बंगलादेशले सहज जित निकालेको छ । मंगलबार राती सम्पन्न खेलमा बंगलादेशले वेस्ट इन्डिजलाई ८ विकेटले पराजित गरेको छ ।

२ सय ६२ रनको लक्ष्य पछ्याएको बंगलादेश ४५ ओभरका २ विकेट गुमाउँदै पुरा गर्यो । बंगलादेशका लागि ओपनर तामिम इकवालले सर्वाधिक ८० रनको योगदान दिए । उनले १ सय १६ बलको सामना गर्दा ७ चौका प्रहार गरे । सौम्य सरकारले ६८ बलमा ९ चौका र १ छक्का प्रहार गर्दै ७३ रन बटुले ।

पहिलो विकेटका लागि सरकार र इकवालले २६ ओभरमा १ सय ४४ रनको साझेदारी गर्दै जित सहज बनाएका थिए । सकिब अल हसन ६१ बलमा ३ चौका र २ छक्का प्रहार गर्दै ६१,मुश्फिकुर रहीम ३२ रनमा अविजित रहे । वेस्ट इन्डिजका लागि शैनन गेब्रियल र रोस्टन चेशले समान १ विकेट लिए । अन्य कुनै पनि बलरले विकेट हात पार्न सकेनन् ।

त्यस अधि डबलिनमा टस जितेर पहिला ब्याटिङ थालेको वेस्ट इन्डिजले निर्धारित ५० ओभरमा ९ विकेट गुमाउँदै २ सय ६१ रन बनाएको थियो । उसका लागि ओपनर शाई होपलले लगातार शतक प्रहार गर्ने क्रममा १ सय ९ रन बनाएपनि टोलीको हार टार्न सकेनन् । होपले १ सय ३२ बलमा ११ चौका र १ छक्का प्रहार गरे ।

रोस्टन चेश ५१, सुनिल अम्ब्रिस ३८ र एस्ली नर्शले १९ रनको योगदान दिए । बंलादेशका लागि कप्तानमशरफे मोर्तज़ाले ३,मुस्ताफिजुर रहमान र मोहम्मद सैफुद्दीनले समान २ विकेट लिए । बंगलादेश,आयरल्यान्ड र वेस्ट इन्डिजबीच त्रिकोणात्मक सिरिज चलि रहेको छ ।