एजेन्सी – ओपनर फाफ डु प्लेसिसले उत्कृष्ट ब्याटिङ गरेपछि इन्डियन प्रिमियर लिग (आईपीएल) को ५५ औं खेलमा चेन्नई सपुर किंग्सले किंग्स इलाभेन पन्जाबलाई १ सय ७१ रनको लक्ष्य दिएको छ ।

पन्जावको घरेलु मैदान मोहालीमा टस हारेर पहिला ब्याटिङ थालेको चेन्नईले निर्धारित २० ओभरमा ५ विकेटको क्षतिमा १ सय ७० रन बनायो । चेन्नईलाई बलियो योगफल सम्म पुर्याउन ओपनर फाफ डु प्लेसिसले सानदार ब्याटिङ गरे । तर शतक पुरा गर्न ४ रनले चुक्न पुगे । १९ ओभरको चौथो बलमा योर्कर बलमा साम कुरनले डु प्लेसिसलाई ९६ रनमा बोल्ड आउट गरेपछि सतक बनाउन चुकेका हुन् । उनले ५५ बलमा १० चौका र ४ छक्का प्रहार गरे ।

डु प्लेसिसले दोस्रो विकेटका लागि सुरेश रैनासँग १ सय २० रनको साझेदारी गरेपछि चेन्नईले बलियो योगफल तयार पार्न सफल भएको हो । यी दुई बीचको शतकीय साझेदारी साम कुरनले १७ ओभरको चौथो बलमा मोहम्मद सामीबाट क्याच गराउँदै तोडेका थिए । रैनाले ३८ बलमा ५ चौका र २ छक्का सहित ५३ रन बटुले ।

त्यस अघि पाँचौ ओभरको पहिलो बलमा करनलेनै अर्का ओपनर शेन वानटशनलाई ७ रनमा बोल्ड आउट गर्दै पन्जावलाई पहिलो सफलता दिलाएका थिए । कप्तान महेन्द्र सिंह धोनी १० रनमा अविजित रहे । पन्जावका साम कुनरले ३ र मोहम्मद सामीले २ विकेट लिए । चेन्नई यो खेलमा विजयी भए सोझैं क्यालिफायर प्रवेश गर्ने छ भने पन्जाव बाहिरिने छ ।