काठमाडौं (हाम्रो खेलकुद)– तेस्रो संस्करणको प्रधानमन्त्री कप एक दिवसिय राष्ट्रिय क्रिकेट प्रतियोगिता जेठ पहिलो साता आयोजना हुने भएको छ । राष्ट्रिय खेलकुद परिषद (राखेप) को आयोजना र नेपालय इन्टरनेसनल प्रा लिको सहकार्यमा प्रधानमन्त्री कप आयोजना हुने आइतबार आयोजित पत्रकार सम्मेलनमा जानकारी गराइयो ।

प्रतियोगिता जेठ १ गते देखी २४ गते सम्म कीर्तिपुरस्थित त्रिवि मैदानमा हुने नेपालय इन्टरनेसनका अध्यक्ष सुवास प्रधानले जानकारी दिए । हरेक दिन एक खेल आयोजना हुनेछ ।
प्रतियोगितामा ७ प्रदेश र तीन विभागिय गरि १० टोलीको सहभागिता रहनेछ । सहभागी टोलीलाई दुई समूहमा विभाजन गरिएको छ । राउन्ड रोविन लिग पछि समूहका शीर्ष २ टोली सेमिफाइनल पुग्नेछन् ।

राष्ट्रिय टोलीका सदस्यले प्रधानमन्त्री कप खेल्नुपर्ने राखेप सदस्य सचिव केशवकुमार विष्टले प्रष्ट पारेका छन् । ‘हामीले राष्ट्रिय टोलीका प्रशिक्षकलाई राष्ट्रिय टोलीका सबै सदस्यले खेल्नु पर्ने जानकारीसहितको पत्र पठाइसकिएको छ,’ सदस्य सचिव विष्टले भने,‘ कारणवश खेल्न नसक्दा एउटा विषय भयो । अन्यथा हामी त्यसरी भाग नलिने खेलाडीलाई स्पष्टिकरण सोध्ने छौं ।’

प्रधानमन्त्री कपको विजेताले उपाधिसहित २० लाख रुपैयाँ प्राप्त गर्ने छ । दोस्रो हुने टोलीले १० लाख रुपैयाँ पाउनेछ । प्रतियोगिताकै उत्कृष्ट खेलाडीले मोटर साइकल पाउने
छन् । त्यस्तै उत्कृष्ट ब्याट्सम्यान र बलरले समान ५० हजार प्राप्त गर्ने छन् ।

प्रतियोगितामा एक हातले क्याच लिने दर्शकले ५० हजार रुपैयाँ पाउने छन् । १ करोड ७५ लाख रुपैयाँ खर्च हुने अनुमान गरिएको प्रतियोगितामा ५० लाख रुपैयाँ पुरस्कारका लागि मात्र छुट्याइएको थियो ।

प्रतियोगिताका लागि राखेपले ८० लाख रुपैयाँ उपलब्ध गराउने बताइएको छ । प्रधानमन्त्री कप क्रिकेट राखेप र नेपालय इन्टरनेसनलको सहकार्यमा प्रतियोगिता हुन लागेको यो दोस्रो पटक हुन लागेको हो । गत वर्ष नेपाल एपिएफ क्लबले त्रिभुवन आर्मी क्लबलाई ६ विकेटले हराउँदै उपाधि जितेको थियो ।