भुपेन्द्र जिसी, काठमाडौं

नेपालले एकदिवसिय (ओडीआई) मान्यता पाएको १४ महिना पुग्दा घरेलु मैदानमा कुनै अन्तर्राष्ट्रिय प्रतियोगिता खेलेको छैन । गत माघमा यूएईलाई २–१ ले पराजित गर्दै नेपालले पहिलो ओडीआई सिरिज जित्दै इतिहास रच्न सफल भएको थियो । आईसीसीले मंगलबार मात्र जारि गरेको खेल तालिका अनुसार नेपालले माघ दोस्रो साता अमेरिका र ओमानसँग विश्वकप लिग -२ अन्तर्गत त्रिकोणात्मक ओडीआई सिरिज खेल्ने भएको छ । उक्त सिरिज टीयू क्रिकेट मैदानमै हुने पक्का भएको छ ।

नेपाली समर्थक र शुभचिन्तक टियू क्रिकेट मैदानमा पहिलो ओडीआई खेलको पर्खाईमा छन् । अझ घरेलु मैदानमा टेष्ट राष्ट्रसँगको नेपालले प्रतिस्पर्धा गरेको हेर्ने एउटा सपना नै बनेको छ । नेपाल क्रिकेट संघ (क्यान) तीन वर्ष यता आईसीसीको निलम्बनमा छ ।

पछिल्लो तीन वर्षमा नेपालले आईसीसीकै रेखदेखमा अन्तर्राष्ट्रिय प्रतियोगितामा सहभागिता जनाउँदै आएको छ । क्यान निलम्बन रहेकै अवस्थामा ओडीआई मान्यता देखी पहिलो वान डे तथा टी ट्वान्टी सिरिज जस्ता सफलता हात पार्न सफल पनि भयो । नेपाली क्रिकेट क्रेजलाई देखेर आईसीसीले दुई पटक टियु क्रिकेट मैदान निरिक्षणको लागि आफ्नो प्रतिनिधि नेपाल पठाएको थियो । यस अर्थमा आईसीसी पनि नेपालमा ओडीआई सिरिज खेलाउन इच्छुक र लालायित छ । क्रिकेट जानकारका अनुसार टियू मैदान योग्य नभएकै कारण यूएईसँगको वान डे र टी ट्वान्टी सिरिज नेपालले घरेलु मैदानमा खेल्न नपाएको बताउँछन् ।

आगामी दुई वर्षमा आईसीसी क्रिकेट विश्वकप लिग–२ को प्रतियोगितामा नेपालले होम अवे मैदान गरि कुल ३६ ओडीआई खेल खेल्ने छ । जस मध्य केहि वान डे नेपालमा हुने छन् । हालसम्म नेपालले खेल्ने तीन सिरिज पक्का हुँदा पहिलो सिरिज नेपालमा हुने पक्का भएको छ भने अन्य दुई नामिबिया र पीएनजीमा हुनेछ ।

पछिल्लोपटक आईसीसी विश्व च्याम्पियनशिप लिग २०१५–१७ अन्तर्गत टियु मैदान योग्य नभएको भन्दै आईसीसीले पपुवा न्युगिनीसँगको खेल नेपालमा गराएको थिएन । पछि नामिबिया र केन्यासँगको खेल आनाकानी गर्दै खेलाएको थियो ।

गत बिहीबार हाम्रोखेलकुदसँग कुरा गर्दै अन्तर्राष्ट्रिय एम्पायर विनयकुमार झाले तत्कालको अवस्थामा टियू मैदान ओडीआई खेलाउन योग्य नभएको स्विकार गरे । झा का अनुसार ओडीआई खेल्न योग्य मैदानमा तीन कुरा सबै भन्दा बढि महत्वपूर्ण हुन्छ । ‘सबै भन्दा पहिला पिचको स्तर राम्रो हुनुपर्छ जुन अहिले हाम्रो छैन । आउटफिल्डमा घाँस भएको हुनुपर्छ । खेलाडीले राम्रो सुरक्षा पाउन सक्ने पेभिलिएन तथा क्यान्टिनको व्यवस्था हुनुपर्छ । अन्य सुविधा भने हाम्रोमा छ । आयरल्यान्डमा पेभिलिएन नभएपनि टेन्ट लगाएर ओडीआई खेल पनि भएका छन् । हामीलाई सबैभन्दा आवश्यक भनेको पिच र आउटफिल्डको स्तर नै हो,’ झाले भने ।

‘कुनैपनि देश ओडीआई खेल्न आउदा उसलाई पिच र आउटफिल्ड राम्रो भए पुग्छ । हाम्रो पेभिलिएन एउटा वान डे स्टाटस पाउने खालको त छैन । तै पनि निर्माणाधीन छ, भवन बन्दै छ । यसैलाई मिलाएर खेलाउन सकिन्छ । पिच र आउटफिल्डमा नियमित काम नभएर बिग्रेको झा को बुझाई छ । पिच र आउट फिल्डलाई नियमित पानी हाल्नुपर्छ,घाँस हटाएर दुबो निरन्तर रोप्नुपर्छ । हाम्रो पिचमा दुबो छैन, दुबो नभएको पिच त्यति राम्रो मानिदैन,’ झाका अनुसार निरन्तर काम गर्ने हो भने कम्तिमा १ महिना देखी डेढ महिनामा टियुलाई वान डे खेल्न योग्य बनाउन सकिन्छ ।

‘टियुको स्तर सुधार गर्नमा धेरै ढिला गरिरहेका छौं । हङकङ हिजो वान डे मान्यता पाएको देश हो । आज गुमाएको छ । भोली नेपाल कहाँ हुनेछ भन्ने कसैलाई पनि थाहा छैन । ओडीआईलाई निरन्तता दिने हो र विश्वकपको ढोका खुल्ला गर्ने हो भने यो विषमा चाडैं सोच्न आवश्यक छ,’ झाले भने ।

वान डे मान्यताको एक वर्ष घरेलु मैदानमा कुनै खेल खेल्न पाएन । विश्वकप लिग-२ नेपालको लागि अवसर बनेर अगाडी आएको छ । बाँकी तीन वर्षको अवधिमा धेरै भन्दा धेरै ओडीआई र अन्तर्राष्ट्रिय खेल हामीले नेपालमै गर्नसके दिर्घकालीन समयमा नेपाली क्रिकेटले विश्वमा अझ छिटो फड्को मार्नेमा कसैको दुई मत छैन । खेलसँगै विस्तारै गुणस्तरिय पुर्वधार निमार्णमा पनि ध्यान दिनुपर्छ । अवसर गुमाएपछि पछुताउनु भन्दापनि गुमाउन नदिने वातावरण सिर्जना गर्न सम्बन्धि निकायको ध्यान जान आवश्यक छ ।