सुर्खेत (हाम्रो खेलकुद)– सुर्खेतमा जारी दोस्रो संस्करणको वाईवाई कर्णाली प्रिमियर लिग (केपीएल) मा बुधबार नेपाल एपीएफले महेन्द्रनगर क्रिकेट एकेडेमीलाई १८ रनले पराजित गर्दै सेमिफाइनल पुगेको छ ।

यो सँगै केपीएलको सेमिफाईनल समिकरण पुरा भएको छ । समूह ‘बी’ बाट एपीएफ विजेता र न्यु होराइजन बुटवल उपविजेताका रुपमा अन्तिम चारमा पुगेका हुन् । समुह ‘ए’ बाट कर्णाली ११ विजेता र त्रिभुवन आर्मी क्लब उपविजेताका रुपमा सेमिफाइनल पुगेका हुन् ।

शुक्रबार हुने सेमिफाइनलको पहिलो खेलमा कर्णाली ११ र न्यु होराइजन तथा अर्कोमा एपिएफ र आर्मीबीच प्रतिस्पर्धा हुनेछ । फाइनल शनिबार हुनेछ ।

सुर्खेतको कालिन्चोक मैदानमा टस जितेर ब्याटिङ थालेको एपीएफले निर्धारित २० ओभरमा ९ विकेट गुमाएर १ सय ४३ रन बनाएको थियो । टोलीका लागि सुमित महर्जनले सर्वाधिक २६,भुवन कार्कीले २०,आयुष्मान बमले १५ र कमल सिंह ऐरीले अविजित १२ जोडे ।

महेन्द्रनगरका सन्तोष भट्ट र आकाश चन्दले समान ३ विकेट लिए । त्यस्तै बिक्रम ठगुन्नाको नाममा २ विकेट रह्यो । १ सय ४४ रनको विजयी लक्ष्य पछ्याएको महेन्द्रनगर २० ओभरमा ८ विकेट गुमाउँदै मात्रै १ सय २५ रन बनाउन सक्यो ।

एपीएफको जितमा कमल सिंह ऐरीले सर्वाधिक ३ तथा भुवन कार्कीले २ विकेट लिए । सन्तोष भट्टले ५० रन बनाए पनि महेन्द्रनगरको हार टार्न सकेनन् । उनले ३५ बलमा ४ चौका र ३ छक्का प्रहार गरे। यस्तै हेमन्त कार्कीले ३० रन बनाउनु बाहेक अन्य ब्याट्सम्यानले उल्लेख्य प्रदर्शन गर्न सकेनन्। प्रतियोगिताको विजेताले ५ लाख र दोस्रो हुने टोलीले २ लाख रुपैयाँ प्राप्त गर्नेछ ।