काठमाडौं (हाम्रो खेलकुद) – थाईल्यान्डमा एसीसी यू१६ इस्टर्न रिजन क्रिकेट प्रतियोगिताको उपाधि जितेको नेपाली यू१६ टोली आज स्वदेश फर्किएको छ ।

नेपालले फाईनलमा मलेसियालाई ५९ रनले पराजित गर्दै उपाधि जितेको थियो । अप्रिल २० देखी सुरु भएको प्रतियोगितामा ८ देशको सहभागिता थियो । नेपालले समुह चरणमा म्यानमारलाई ७ विकेट र मलेसियालाई ३९ रनले पराजित गरेको थियो । थाईल्यान्डसँगको खेल वर्षाको कारण रद्ध हुँदा समुह ए को विजेता बन्दै सेमिफाईनलमा प्रवेश गरेको थियो । सेमिफाईनलमा नेपालले हङकङलाई ४ विकेटले पराजित गर्दै फाईनलमा प्रवेश गरेको थियो ।

तोकिएको समय भन्दा झण्डै दुई घण्टा ढिला गरेर नेपाली यू१६ टोली दिउँसो ४ बजे त्रिभुवन अन्तर्राष्ट्रिय विमानस्थल आईपुगेको थियो । राष्ट्रिय खेलकुद परिषदका सदस्य सचिव केशव कुमार विष्ट, राष्ट्रिय टोलीका प्रशिक्षक जगत टमटा लगाएतले नेपाली टोलीलाई फुलमाला र खादा लगाएर स्वागत गरे ।

कप्तान विशाल विक्रम केसीले त्यहाँको विकेटको कारण रन बनाउन केहि गाह्रो भएपनि विकेट बचाएर रन बनाउन सक्दा उपाधि जित्न सफल भएको बताए । विशालले टोलीको सम्रग प्रर्दशनमा सन्तुष्ट रहेको बताए । खेलाडीहरुको अथक मेहनत र प्रयासले गर्दा उपाधि जित्न सफल भएको प्रशिक्षक वसन्त शाहीले बताए ।