सुर्खेत (हाम्रो खेलकुद) – सुर्खेतमा जारी दोस्रो संस्करणको वाई वाई कर्णाली प्रिमियर लिग(केपीएल)मा शनिवार भएको खेलमा एपीएफ र कर्णाली ११ विजयी भएका छन् । सशस्त्र प्रहरी बल एपीएफले हिमालयन क्रिकेट एकेडेमीलाई ८४ रनले पराजित गर्यो । त्यस्तै पहिलो खेलमा कर्णाली ११ ले मध्य पश्चिम क्रिकेट क्लवलाई ३१ रनले पराजित गरेको थियो ।

सुर्खेतको कालिन्चोक क्रिकेट मैदानमा टस जितेर पहिला ब्याटिङ थालेको एपीएफले निर्धारित २० ओभरमा मात्र २ विकेटको क्षतिमा १ सय ९२ रन बनाएको थियो । एपीएफलाई विशाल योगफल तयार पार्न राष्ट्रिय टिमबाट खेली सकेका ओपनर अनिल कुमार शाहले सानदार शतक प्रहार गरे । अनिलले ५८ बलमा १५ चौका र ३ छक्का प्रहार गर्दै १ सय २ रनको शतकीय पाली खेले । त्यस्तै शरद भेषवाकरले ४९ बलमा ४ चौका र ३ छक्का प्रहार गर्दै ५१ रनमा आउट हुँदा प्रदीप ऐरी १२ र शंकर राना १३ रनमा नट आउट रहे । हिमालयनका लागि सन्दीप खड्का र हेमन्त थापाले समान एक विकेट हात पारे ।

१ सय ९३ रनको विशाल लक्ष्य पछ्पाएको हिमालयन क्रिकेट एकेडेमीले १९.२ ओभरमा अल आउट हुदै १ सय ८ रन मात्र बनाउन सक्यो । उसका लागि पवन कार्कीले २४,सुरेन्द्र चन्द १४ र पदम के सीले १३ रन जोड्न बाहेक अन्य कुनै पनि ब्याट्सम्यानले दोहोरो अंकमा रन छुन सकेनन् । एपीएफका लागि शरद भेषवाकरले ३.२ ओभरमा १४ रन खर्चेर ४ विकेट लिए । सन्दीप जोरा २,पुरन बिक र भुवन कार्कीले समान २ विकेट हात पारे । शतक प्रहार गरेका अनिल कुमार शाह म्यान अफ द म्याच घोषित भए ।

त्यस्तै आज भएको पहिलो खेलमा आयोजक कर्णाली ११ ले मध्य पश्चिम क्रिकेट क्लवलाई ३१ रनले पराजित गर्यो । टस जितेर पहिला ब्याटिङ गरेको कर्णाली ११ ले निर्धारित २० ओभरमा ४ विकेट गुमाउँदै १ सय ४८ रन बनाएको थियो । उसका लागि रविन्द्र जंग शाहीले ५६ बलमा ६ चौका सहित ६१,कृष्ण कार्की ४६,लोकेश बम १७ रनको योगदान दिए । मध्य पश्चिमका तुल्सी राम अहिनले २ विकेट हात पारे ।

१ सय ४९ रनको लक्ष्य पछ्पाएको मध्यपश्चिमले निर्धारित २० ओभरमा ७ विकेट गुमाउँदै १ सय १७ रन बनायो । उसका लागि शैलेन्द्र यादवले ३१,राजवीर सिंह ३०,आकश विष्ट २३ र अमित तामाङले १० रन जोडे । कर्णाली ११ का लागि कृष्ण कार्कीले ३,किशोर महतो २ विकेट लिए । अलराउण्डर प्रर्दशन गरेका कृष्ण कार्कीले म्यान अफ द म्याच घोषित भए ।