सुर्खेत (हाम्रो खेलकुद) – दोस्रो संस्करणको वाई वाई कर्णाली प्रिमियर लिग (केपीएल) को दोस्रो दिन त्रिभुवन आर्मी क्लब र न्यू होराइजन बुटवलले जित दर्ता गरेका छन् । आर्मीले लालीगुरास क्रिकेट एकेडेमीलाई ५८ रनले पराजित गर्दै विजयी सुरुवात गरेको हो ।

कालिन्चोक क्रिकेट मैदानमा टस जितेर पहिला ब्याटिङ गर्ने निर्णय लिएको आर्मीले निर्धारित २० ओभरमा ९ विकेटको क्षतिमा १ सय ७६ रन बनाएको थियो । आर्मीका लागि युवा खेलाडी कुशल मल्लले मात्र २१ बलमा ३ छक्का र २ चौका प्रहार गर्दै ४२ रनको योगदान दिए । त्यस्तै विकेटकीपर राजु रिजाल ४९,हरि वहादुर चौहान १९,अनिल कुमार मण्डल ९,सोमपाल कामी २,विनोद भण्डारी १२,रोहित कुमार पौडेल ९, भिम सार्की ५ रनमा आउट भए । लालिगुरासका लागि तिलक मगर,यश कनैदिया र प्रनव शाहले समान २ विकेट लिए ।

१ सय ७७ रनको विजयी लक्ष्य पछ्पाएको लालिगुरासले निर्धारित २० ओभरमा अल आउट हुँदै १ सय १८ रनमा समेटियो । उसका लागि बिवेक राजपुत २७,प्रनव शाह २० र दिपेन योगीले १३ रन जोड्न बाहेक अन्यले राम्रो प्रर्दशन गर्न सकेनन् । आर्मीको जितमा भिम सार्की,जितेन्द्र मुखिया र हरि बहादुर चौहानले २ विकेट लिए । त्यस्तै कुशल मल्ल र शुसन भारीको नाममा समान १ विकेट रह्यो । मल्ल म्यान अफ द म्याच घोषित भए ।

त्यसअघि पहिलो खेलमा वुटवलले महेन्द्रनगर क्रिकेट एकेडेमीलाई ७१ रनले पराजित गर्दै विजयी सुरुवात गरेको थियो । टस जितेर पहिला ब्याटिङ गर्ने निर्णय लिएको वुटवलले निर्धारित २० ओभरमा ४ विकेट गुमाउँदै १ सय ६६ रन बनाएको थियो । वुटवलका लागि ओपनर सुनिल धमलाले ४० बलमा ८ चौका र २ छक्का प्रहार गर्दै ६० रनको योगदान दिए । त्यस्तै अर्जुन रायमाझीले ४०,सुरोज दराई २१,सुवेन्दु पाण्डे १४ रनमा आउट भए । निश्चल चौधरी ११ र विशाल सुनार ८ रनमा अविजित रहे । महेन्द्रनगरका सन्तोष भट्टले २, विक्रम ठंगुना र विकाश एग्रीले समान १ विकेट लिए ।

१ सय ६७ रनको विजयी लक्ष्य पछ्पाएको महेन्द्रनगर १९.१ ओभरमा ९५ रनमा अल आउट भयो । उसका सन्तोष भट्ट २२,सन्जु धामी १३,मोहम्मद सोनु अन्सारी ११,सुशिल कार्कीले १० रनको योगदान दिए । बुटवललाई जिताउन शक्ति गौचनले ३,विकास श्रेष्ठ र सुनिल धमलाले समान २ तथा विपिन खत्रीले १ विकेट लिए । उत्कृष्ट अल राउण्डर प्रर्दशन गरेका धमला म्यान अफ द म्याच घोषित भए ।