नेपालगन्ज (हाम्रो खेलकुद) – आठौं राष्ट्रिय खेलकुद अन्तर्गत पुरुष क्रिकेटको उपाधिको लागि नेपाल पुलिस क्लव र सशस्त्र प्रहरी बल (एपीएफ) बीच प्रतिस्पर्धा हुने छ ।

मंगलवार सेमिफाईनल खेलमा एपीएफले प्रदेश नम्बर १ लाई ८ विकेट र पुलिसले नेपाल आर्मीलाई ३ रनले हराउँदै फाईनलमा प्रवेश गरेका हुन् । कोहलपुर क्रिकेट मैदानमा टस जितेर पहिला ब्याटिङ गर्ने निर्णय लिएको पुलिसले निर्धारित २० ओभरमा ९ विकेट गुमाउँदै ८० रन बनाएको थियो ।

पुलिसका लागि अमित श्रेष्ठले सर्वाधिक २३ रनको योगदान दिए । त्यस्तै दिलिप नाथ ११,आरिफ शेख ८ र मञ्जित श्रेष्ठ ९ रनमा आउट भए । आर्मीका सहाब आलमले ३,सोमपाल कामी र सुशन भारीले समान २ विकेट लिए ।

८१ रनको लक्ष्य पछ्पाएको आर्मी १८ ओभरमा अल आउट हुँदै ७७ रनमा समेटियो । आर्मीका लागि कुशल मल्ल २३,राजु रिजाल १४ र राजेश पुलामी मगरले १० रन जोड्न बाहेक अन्य कुनै पनि ब्याट्सम्यानले राम्रो प्रर्दशन गर्न सकेनन् । आर्मीका तल्लोक्रमका विनोद भण्डारी,सोमपाल कामी,रोहित कुमार पौडेल,शुसन भारी र सहाव आलम डक आउट भए ।

पुलिसका सागर ढकालले ४ ओभरमा १ मेडन सहित १४ रन खर्चेर ४,नबिन सिंह थापा र ललित नारायण राजवंशीले समान ३ विकेट लिए । सागर खेलमा म्यान अफ द म्याच चुनिए ।