एजेन्सी – इन्डियन प्रिमियर लिग (आईपीएल) को ४१ औं खेलमा आज सनराइजर्स हैदरावाद र चेन्नई सुपर किंग्सबीच प्रतिस्पर्धा हुँदैछ । खेल नेपाली समय अनुसार बेलुका ८ : १५ देखी चेन्नईको घरेलु मैदान एमए चिदम्बरम स्टेडियममा सुरु हुने छ ।

यसअघि हैदरावादको घरेलु मैदानमा चेन्नई ६ विकेटले पराजित भएको थियो । चेन्नई प्लेअफ नजिक छ । १० खेलमा ७ मा जित र ३ मा हारका साथ १४ अंक जोड्दै दोस्रो स्थानमा छ । चेन्नई आजको खेलमा विजयी भए प्ले अफ लगभग पक्का पक्की बन्नुका साथै शीर्ष स्थानमा उक्लिने छ । ९ खेलमा ५ मा जित र ४ मा पराजित भएको हैदरावाद १० अंक जोड्दै चौथो स्थानमा छ । प्ले अफको संभावना बलियो बनाउन हैदरावादलाई पनि यो खेल जित्नु पर्ने दबाब छ ।

जारी आईपीएलमा हैदरावादका डेविड वार्नर र जोनी बयरस्ट्रोले उत्कृष्ट प्रर्दशन गर्दै आएका छन् । पहिलो विकेटका लागि जारी आईपीएलमा ४ पटक शतकीय साझेदारी गरि सकेका यी दुई ओपनर जोडीलाई रोक्न चेन्नईका बलरलाई चुनौती हुने छ ।

जारी आईपीएलमा सर्वाधिक रन बनाउने खेलाडीमा शीर्ष स्थानमा रहेका वार्नरले ९ खेलमा १ शतक, ६ अर्ध शतक सहित ७३.८५ को औसतमा कुल ५ सय १७ रन बटुलिसकेका छन् । दोस्रो स्थानमा रहेको बेयरस्ट्रोले समान खेलमा ४ सय ४५ रन जोडी सकेका छन् । हैदरावादका वार्नरसँगै बेयरस्टो, सन्दीप शर्मा, खलील अहमद, भुवनेश्वर कुमार, राशिद खान मुख्य हतियार हुन् ।

जारी आईपीएलमा महेन्द्रसिंह धोनीले पनि उत्कृष्ट प्रर्दशन गरि रहेका छन् । गत बेंगलोरविरुद्ध धोनीले ४८ बलमा ७ छक्का र ५ चौका सहित ८४ रनमा अविजित इनिङ्स खेलेका थिए । जारी आईपीएलमा धोनीले ९ खेलमा ३ सय १४ रन आफ्नो नाममा लेखाई सकेका छन् ।

हैदरावादका बलरलाई धोनीलाई रोक्न चुनौती हुने छ । चेन्नईका अन्य आम्बाती रायुडु,सुरेश रैना,शेन वाटशनले औसत प्रर्दशन गरेका छन् । स्पिनर इमरान ताहिर,रविन्द्र जडेजा,हरभजन सिंह चेन्नईका मुख्य हतियार हुन् ।