नेपालगन्ज (हाम्रो खेलकुद) – आठौं राष्ट्रिय खेलकुदअन्तर्गत क्रिकेटतर्फ पुरुषअन्तर्गत पहिलो सेमिफाइनलमा प्रदेश १ लाई पराजित गर्दै सशस्त्र प्रहरी बल एपीएफ फाईनलमा पुगेको छ ।

मंगलबार भएको पहिलो सेमिफाइनल खेलमा प्रदेश नम्बर १ लाई ८ विकेटले पराजित गर्दै एपीएफ फाइनलमा पुगेको हो । सामान्य ५० रनको लक्ष्य एपीएफले १०.५ ओभरमा २ विकेटको क्षतिमा ५३ रन बनाउदै सहजै पुरा गर्यो । एपीएफको सहज जितमा शंकर राना २३ र प्रदीप ऐरी १७ रनमा अविजित रहे । त्यस्तै शरद भेषवाकर २ र अनिल कुमार शाह ७ रनमा आउट भए । प्रदेश १ का पुष्प थापा र दिपेश कंडेलले समान एक विकेट लिए ।

त्यसअघि कोहलपुर क्रिकेट मैदान टस जितेर पहिला ब्याटिङको निर्णय लिएको प्रदेश १ ले १६.३ ओभरमा अल आउट हुँदै ४९ रनमा समेटिएको थियो । प्रदेश १ का लागि मिनाश थापा र सुन्नी पुनले समान १४ रन बनाउन बाहेक अन्य कुनै पनि ब्याट्सम्यानले दोहोरो अंकमा रन छुन सकेनन् । प्रदेश १ का ४ ब्याट्सम्यान डक आउट भए ।

एपीएफका लागि शरद भेषवाकरले ४ ओभरमा १३ रन खर्चेर ४,बसन्त रेग्मी ३,भुवन कार्की र अभिनास बोहोराले समान एक विकेट लिए । शरद खेलमा म्यान अफ द म्याच चुनिए । त्यस्तै आजनै त्रिभुवन आर्मी क्लब र नेपाल पुलिस क्ववबीच दोस्रो सेमिफाइनल हुने छ ।