काठमाडौं (हाम्रो खेलकुद) – नेपाली यू१९ टोली मलेसियामा विहिवार सम्पन्न आईसीसी यू१९ विश्वकप छनोट अन्तर्गत एसिया प्रतियोगिता खेलेर शुक्रबार बेलुका स्वदेश फिर्ता भएको छ ।

तोकिएको समय दुई घण्टा ढिला गरि बेलुका ८ बजे त्रिभुवन विमानस्थल आई पुगेको नेपाली यू१९ टोलीलाई स्वागत गर्न कुनैपनि सरकारी निकाय पुगेका थिएनन् । विमानस्थलमा प्रशिक्षक विनोद दास,कप्तान रोहित कुमार पौडेल,भिम सार्की लगातका सबै खेलाडी निरास र उनिहरुको अनुहार मलिन देखिन्थ्यो ।

प्रक्षिक विनोद दासले भाग्यले साथ नदिँदा विश्वकप खेल्न नपाएको बताए । ‘यूएईसँगको खेलमा हाम्रा पनि साना सान गल्ती थिए । हरेक दिन पानी परेपनि १०-१५ मिनेटमै सुक्थ्यो पनि । त्यो दिन नै होला सायद पानी परेपछि सुकेन । हामीलाई भाग्ले नराम्रोसँग धोका दियो । राम्रो खेलेर मात्र पुग्दो रहेनछ,भाग्यले पनि साथ दिनु पर्ने रहेछ,’ दासले भने

कप्तान रोहित कुमार पौडेलले यूएईसँगको हारपछि सबै खेलाडी निरास हुनुका साथै केहि खेलाडी रोएको बताए । कप्तान रोहितले टोलीका सबै खेलाडीले आफ्नो जीवनमा १ रनको महत्व सधैंभर बुझिरहने बताए ।

नेपाल विश्वकपछनोटका ५ खेलमा ८ अंक जोड्दै दोस्रो स्थानमा रहँदै विश्वकपमा छनोट हुन सकेन । शीर्षस्थानमा रहेको यूएईले भने ५ खेलमा १० अंक जोडेको थियो ।

विश्वकप छनोटमा नेपालले पहिलो खेलमा सिंगापुरलाई २ सय १७ रनको फराकिलो अन्तरले पराजित गरेको थियो । दोस्रो खेलमा यूएईसँग डकवर्थ लेविस मेथर्डका आधारमा १ रनले पराजित हुँदा तेस्रो खेलमा मलेसियालाई ८ विकेटले हराएको थियो । त्यस्तै चौथो खेलमा ओमानलाई १ सय ५० रनको फराकिलो अन्तरले पराजित गर्दा अन्तिम खेलमा कुवेतलाई ८ विकेटले हराएको थियो। यूएईसँगको एक रनको हारलेनै नेपाललाई विश्वकप सम्म युर्याउन सकेन ।