काठमाडौं (हाम्रो खेलकुद) – मिडिल अडरका ब्याट्सम्यान नोमन बुद्रोले धैर्यताका साथ अर्ध शतक प्रहार गरेपछि मलेसियामा जारी आईसीसी यू१९ विश्वकप एसिया छनोट अन्तरगत अन्तिम खेलमा कुवतेले नेपाललाई १ सय ५८ रनको मध्यम लक्ष्य दिएको छ ।

क्वालालाम्पुरमा टस हारेर ब्याटिङको निम्तो पाएको कुवेतले ४९.४ ओभरमा अल आउट हुँदै १ सय ५७ रन बनायो । उसका लागि नोमन बुद्रोले अर्ध शतकीय इनिङ्स खेले । नेपाली बलरको डटेर सामना गरेका उनले अन्तिम विकेटका रुपमा रन आउट हुनु अघि १ सय २० बलमा ८ चौका सहित ७० रनको योगदान दिए ।

तेस्रो ओभरको पाँचौ बलमा राशिद खानले मिट भावसारलाई १० रनमा बोल्ड आउट गर्दै पहिलो सफलता दिलाएका थिए । राशिदलेनै कप्तान अब्दुल सद्दीकलाई पवन सरार्फबाट पाँचौ ओभरको पहिलो बलमा शून्यमा पेभिलिएन फर्काए । तेस्रो विकेटका लागि गोकुल कुमार र नोमन बुद्रोले ७४ रनको साझेदारी गर्दै कुवेतको इनिङ्स उकासे ।

यी दुईबीचको साझेदारी सुर्य तामाङले २४ ओभरको दोस्रो बलमा कुमारलाई ३६ रनमा बोल्ड आउट गर्दै तोडे । उनले ६६ बलमा ५ चौका प्रहार गरे । २६ ओभरको चौथो बलमा तामाङलेनै गोविन्द्र कुमारलाई भिम सार्कीबाट क्याच गराउदै १ रनमा पेभिलिएन फर्काए ।

कुशल मल्लले ३१ ओभरको चौथो बलमा सन्जीव नायरलाई ६ रनमा आउट गरे । मल्ललेनै ३३ ओभरको अन्तिम बलमा हमजा कुरेशीलाई रित गौतमबाट ३ रनमा आउट गरेका थिए । तल्लो क्रममा हमोद अमानुल्लाह १७ रनमा आउट भए ।

नेपालका लागि कप्तान रोहित कुमार पौडेलले ३ ओभरमा १३ रन खर्चेर ३ विकेट लिए । कुशल मल्ल,राशिद खान र सुर्य तामाङको नाममा समान २ विकेट रह्यो । विश्वकपमा नेपालले यो खेल जितेर मात्र हुँदैन उता अर्को खेलमा ओमानले यूएईलाई हराउनु पर्ने हुन्छ ।

ओमानले यूएईलाई १ सय ६ रनको सामान्य लक्ष्य दिएको छ ।