काठमाडौं (हाम्रो खेलुकद) – मनमोहन मेमोरियल क्रिकेट सेन्टरको आयोजनामा दोस्रो संस्करणको प्रदेश स्तरीय राष्ट्रिय यु–१६ क्रिकेट प्रतियोगिता वैशाख तेस्रो साता आयोजना हुने भएको छ ।

आयोजक मनमोहन मेमोरियल क्रिकेट सेन्टरले मंगलबार राजधानीमा पत्रकार सम्मेलनको आयोजना गर्दै दोस्रो संस्करणको प्रतियोगिता वैशाख १८ गतेबाट २४ गतेसम्म कीर्तिपुरस्थित त्रिवि क्रिकेट मैदानमा हुने जानकारी गराएको हो ।

३० ओभरमा हुने प्रतियोगितामा सात प्रदेशका यु–१६ टोलीले प्रतिस्पर्धा गर्नेछ । सहभागी टोलीलाई २ समूहमा विभाजन गरिनेछ । हरेक समूहका शीर्ष दुई टोलीले सेमिफाइनलमा स्थान बनाउनेछ ।

राष्ट्रिय स्तरको प्रतियोगिताको लागि युवा तथा खेलकुद मन्त्रालयले आयोजना गरेको स्कुल यु–१६ क्रिकेट प्रतियोगितामा गरिएको खेलाडी छनोटलाई आधार मानेर टिम निर्माण गरिनेछ ।

प्रतियोगिताको विजेताले २ लाख ५० हजार रुपैयाका साथै सोही बराबरीको खेल सामग्री प्राप्त गर्नेछ । दोस्रो हुने टोलीले १ लाख २५ हजार रुपैया र सोही बराबरको खेल सामग्री प्राप्त गर्ने सेन्टरका अध्यक्ष ठाकुर गैरेले पत्रकार सम्मेलनमा जानकारी गराए ।

म्यान अफ दि सिरिज, वेस्ट बलर, बेस्ट ब्याट्सम्यान र इमर्जिङ खेलाडीलाई खेल सामग्री प्रदान गरिने छ ।