काठमाडौं (हाम्रो खेलकुद) – आईसीसी यू-१९ विश्वकप छनोटअन्तर्गत एसिया क्षेत्रको दोस्रो खेलमा शनिबार नेपाल यूएईसँग डकवर्थ लेविस मेथडका आधारमा १ रनले पराजित भएको छ । यस पराजयले नेपालको विश्वकपमा छनोट हुने लक्ष्यमा ठूलो धक्का पुगेको छ ।

नेपालले प्रस्तुत गरेको २ सय ४८ रनको लक्ष्य पछ्याउने क्रममा यूएई ३० ओभरमा ३ विकेटको क्षतिमा १ सय २२ रन जोड्दा वर्षा बाधक बन्यो । सो अवस्थामा खेल सुचारु हुन नसक्दा नेपाल डकवर्थ लेविसका आधारमा १ रनले पराजित भएको हो ।

नेपालका लागि यू १९ क्रिकेटमा डेब्यू गरेका हरि बहादुर चौहानले ६७ र भिम सार्कीले ५३ रन बनाएपनि हार टार्न सकेनन् । हारका बाबजुद चौहान खेलमा म्यान अफ द म्याच चुनिए । यो हारसँगै अब नेपालले बाँकी खेलमा मलेसिया, कुवेत र ओमानलाई पराजित गरेर मात्र हुँदैन, यूएईको नतिजा पनि अनुकूल आउनुपर्ने हुन्छ । नेपालले यूएईसँग हानुको प्रमुख ३ कारण यस प्रकार छन् ।

३. कमजोर ब्याटिङ

नेपालको आजको हारको कारण मध्य एक ब्याटिङ पनि हो । ओपनर रित गौतम र पवनर सरार्फले पहिलो विकेटका लागि २२ रनको साझेदारी गरेका थिए । पवन १२ रनमा आउट भएसँगै मध्यक्रममा कप्तान रोहित कुमार पौडेल १८, आशिफ शेख २७, सन्दीप जोरा ४ र रित गौतम ४४ रनमा आउट हुँदा २६ ओभरमा ११५–५ को कमजोर अवस्थामा पुगेको थियो ।

छैटौं विकेटका लागि हरि बहादुर चौहार र भिम सार्कीले ९२ रनको साझेदारी गर्दै नेपालको इनिंग उकासे । तर भीम ४३ ओभरको पहिलो बलमा ५४ बलमा ४ चौका र २ छक्का प्रहार गर्दै ५३ रनमा आउट भएपछि नेपालको विकेट निरन्तर गुमायो । कमलसिंह ऐरी र सागर ढकाल समान दुई तथा कुशल मल्ल र राशिद खान समान १–१ रनमा आउट भए ।

चौहानलाई भीम बाहेक अन्य कुनै पनि ब्याट्सम्यानले राम्रो साथ दिन सकेनन् । चौहान ७४ बलमा ७ चौका प्रहार गर्दै ६७ रनमा अविजित रहे । मध्यक्रम र तल्लोक्रमका ब्याट्सम्यानले जिम्मेवारीका साथ ब्याटिङ गर्न सकेको भए नेपालले अरु ३०-३५ रन जोड्न सक्थ्यो । जसले गर्दा लक्ष्य पनि विशाल हुनुका साथ डकअर्थ लेविस मेथर्डमा पनि नेपाललाई फाईदा पुग्दै विजय हुन सक्थ्यो ।

२.अरविन्द्र र टन्डनरको सतकीय साझेदारी

नेपालको हारको अर्को प्रमुख कारण को यूएईका लागि व्रित्य अरविन्द्र र अंश टन्डनरले तेस्रो विकेटका लागि गरेको शतकीय साझेदारी । नेपालले पहिलो ओभरको अन्तिम बलमा यूएईका कप्तान आर्यन लाक्रालाई ४ रनमा आउट गरेको थियो । त्यस्तै पाँचौ ओभरको चौथो बलमा सायद हैदरलाई ११ रनमा आउट गर्दै सुरुवात गरेको थियो । तर तेस्रो विकेटका लागि व्रित्य अरविन्द्र र अंश टन्डनरले १ सय १ रनको साझेदारी गर्दै नेपालका बलरलाई दवावमा राखेका थिए ।

३० ओभरको अन्तिम बलमा टन्डनरलाई सागर ढकालले ५४ रनमा क्याच आउट गर्दै साझेदारी तोडेको वेला वर्षा सुरु भएको थियो । तर वर्षा नरोकिएपछि खेल डकअर्थ लेविसमा पुग्यो । यी दुईको साझेदारी छिट्टै तोड्न सकेको भए युएईले ३० ओभरमा १ सय २२ रन नबनाउन पनिसक्थ्यो साथै अरु एक दुई विकेट बढि गुम्न सक्थ्यो । यूएईको अरु दुई विकेट बढि गएको भएपनि नेपाल विजय हुने थियो । तर विकेट ३ मात्र गुमेको अवस्थामा यूएईलाई फाईदा पुग्यो ।

१. वर्षा

नेपालले आजको हार्नुको मुख्य कारण वर्षा नै हो । यदी वर्षाको कारण खेल सुचारु भएको खण्डमा नेपालको जितको संभावना उच्च थियो । ३० ओभरमा यूएईले १ सय २२ रन बनाउन ३ ब्याट्सम्यान गुमाई सकेको थियो । उसलाई जित्न अरु २० ओभरमा १ सय २५ रन बनाउनु पथ्र्यो । जुन रन जोड्न दवावकाबीच खेल्दा खराब सट खेल्नुका साथै विकेट गुम्ने उच्च सम्भावना थियो । नेपाली कसिलो बलिङसामु २० ओभरमा १ सय २५ रन जोड्न यूएईलाई कठिन थियो । तर दुर्भाग्य भन्नुपर्छ वर्षाको कारण नेपाल १ रनले पराजित हुन पुग्यो ।