एजेन्सी – ओपनर क्विन्टन डी ककले सानदार अर्धशतक प्रहार गरेपछि इन्डियन प्रिमियर लिग (आईपीएल) को २७ औं खेलमा मुम्बई इन्डियन्सले राजस्थान रोयल्सलाई १ सय ८८ रनको विशाल लक्ष्य दिएको छ ।

घरेलु मैदान वानखेडेमा टस हारेर पहिला ब्याटिङ थालेको मुम्बईले निर्धारित २० ओभरमा ५ विकेटको क्षतिमा १ सय ८७ रन बनायो । मुम्बईका लागि ओेपनर डी ककले ५२ बलमा ६ चौका र ४ छक्का प्रहार गर्दै ८१ रनमा आउट भए । डी ककलाई जोफ्रा आर्चरले १९ ओभरको तेस्रो बलमा विकेटकीपर जस बटलरबाट क्याच गराए । त्यस्तै अर्का ओपनर रोहित शर्माले ३२ बलमा ६ चौका र १ छक्का प्रहार गर्दै ४७ रनमा आउट भए ।

पहिलो विकेटका लागि शर्मा र डी ककले १०.५ ओभर सम्म ९६ रनको उत्कृष्ट साझेदारी गर्दै सानदार सुरुवात दिलाएका थिए । शर्मालाई जोफ्रा आर्चरले विकेटकीपर जस बटलरबाट क्याच गराउँदै साझेदारी तोडे। १४ ओभरको पहिलो बलमा धवन कुलकर्णीले सुर्य कुमार यादवलाई १६ रनमा बोल्ड आउट गर्दिए ।

पन्जावसँगको खेलमा विष्फोटक ब्याटिङ गरेका काइरन पोलार्डलाई जोफा आर्चरले १७ ओभरको दोस्रो बलमा श्रेयस गोपालबाट ६ रनमा क्याच आउट गराए । हार्दिक पान्ड्याले ११ बलमा १ चौका र ३ छक्का प्रहार गर्दै २८ रनमा अविजित रहे । राजस्थानका लागि जोफ्रा आर्चरले ४ ओभरमा ३९ रन खर्चेर ३ विकेट लिए । त्यस्तै धवन कुलकर्णी र जयदेव उनादकटको नाममा समान १ विकेट रह्यो ।