भुपेन्द्र जिसी, काठमाडौं

आईसीसी यू१९ विश्वकप एक दिवसिय एसिया छनोट प्रतियोगिता शुक्रबारदेखि मलेसियामा सुरु हुँदैछ । ६ दिन सम्म चल्ने प्रतियोगितामा ६ टोलीबीच प्रतिस्पर्धा हुनेछ । कुल १५ खेल हुँदा शीर्षस्थानमा रहन सफल हुने टोलीले अर्को वर्ष दक्षिण अफ्रिकामा हुने विश्वकप खेल्न पाउनेछ ।

प्रतियोगितामा नेपालसहित मलेसिया, सिंगापुर, कुवेत, यूएई र ओमान छन् । राष्ट्रिय टोलीबाट खेलिसकेका र घरेलु फ्रेन्चाईज लिगमा उत्कृष्ट प्रर्दशन गरिरहेका खेलाडीको बाहुल्यता रहेको नेपाल अन्य देशको तुलनामा विश्वकपमा छनोट हुन बलियो र प्रमुख दावेदार टोली हो ।

अप्रिल ६ मा मलेसिया जानु अघि नेपाली यू१९ टोलीले भारतीय आन्द्र स्टेट क्रिकेट टिमसँग ६ अभ्यास खेल खेलेको थियो । जसमा ४ खेलमा विजयी हुँदा २ खेलमा भने हार ब्यहोयो । नेपालले खेलेका सबै अभ्यास खेलमा २ सय रन कटाएको थियो । अभ्यासको प्रर्दशनले सधैं कमजोर मानिने ब्याटिङ यसपटक भने बलियो रहेको पुष्टि गरेको छ ।

यू१९ नेपाली टोलीका प्रमुख खेलाडीमध्यका भीम सार्की पनि यसपटक ब्याटिङ बलियो रहेको बताउँछन् । ‘यस पटक हाम्रो ब्याटिङ ८-९ नम्बरसम्म छ । धेरै अनुभवी खेलाडी छन् । त्यसले गर्दा यस पटक हाम्रो बलियो पक्ष्य भनेको नै ब्याटिङ हो । राम्रो प्रदर्शन गर्दै विश्वकप खेल्नेमा हामी विश्वस्त छौं,’ भीमले भने ।

नेपाली राष्ट्रिय सिनियर टोलीबाट पवन सरार्फ, कप्तान राहित कुमार पौडेल र सन्दीप जोराले खेलिसकेका छन् । भीमले यूएईसँगको सिरिजका लागि १६ सदस्य टोलीमा परेपनि डेब्यू भने गर्ने मौका पाएनन् । नेपाली टोलीमा रहेका प्रतिस जिसी र अभिषेक बस्नेत बाहेक अन्य सबै खेलाडीमा घरेलु फ्रेन्चाइज लिगको अनुभव छ ।

सबै खेलाडीहरु विश्वकप खेल्नेमा आत्माविश्वासी छन् । राष्ट्रिय टोलीमा राम्रो छाप छोडी सकेका र पहिलो पटक यू१९ कप्तानी भूमिका पाएका रोहित कुमार पौडेल पनि विश्वकप खेल्नेमा ढुक्क छन् । रोहित पहिलो कप्तानीमै नेपाललाई विश्वकप खेलाउन त्यतिकै आतुर पनि देखिन्छन् ।

प्रशिक्षक विनोद दास भने विपक्षी टिमलाई कमजोर आक्दैनन् । दासका अनुसार कुन टोली कस्तो छ त्यो थाहा छैन । यू१९ क्रिकेटमा खेलाडी एक-एक वर्षमा परिवर्तन हुने हुँदा विपक्षी कस्तो छ भन्ने थाहा नहुने दासको तर्क छ । अझ यूएई, ओमान र कुवेतमा भारत र पाकिस्तानबाट गएका खेलाडीहरु खेल्ने हुँदा केहि भन्न नसकिने दासको भनाई छ । प्रशिक्षक दासका अनुसार नेपाल सहभागी टोलीलाई हराउन भने पूर्ण रुपमा तयार छ ।

नेपालले पहिलो खेल शुक्रबार सिंगापुरसँग खेल्ने छ । सिंगापुर नेपाल भन्दा तुलानात्मक रुपमा कमजोर टोली हो । सिंगापुरमाथि नेपाल निरन्तर रुपमा हाबी हुँदै आएको छ । शनिवार नेपालको प्रमुख प्रतिद्वन्द्वी मानिएको यूएईसँग भिड्ने छ । यूएई र नेपालबीच पछिल्लो समय गत वर्ष भएको एसीसी यू१९ एसिया कप क्रिकेटमा भिडेका थिए । यूएईले प्रस्तुत गरेको २ सय ६९ रनको लक्ष्य नेपालले रोहित कुमार पौडेलको ९२ र सन्दीप जोराको ६७ रनमा ३ बल अगाडीनै ७ विकेटको क्षतिमा पुरा गरेको थियो । यस पटक रोहित कप्तान हुँदा जोरा प्रमुख ब्याट्सम्यान हुन् ।

नेपालले सोमबार मलेसियासँग खेल्ने छ । नेपाल मलेसियासँग अहिले सम्म पराजित भएको छैन । तर मलेसियाले पछिल्लो समय यू१९ क्रिकेटमा भने राम्रो सुधार गरेको छ । नेपालले मंगलबार ओमान र बिहीबार कुवेतसँग खेल्दै यस प्रतियोगिता सकाउने छ । ओमान र कुवेत दुवै नेपालभन्दा तुलानात्मक रुपमा कमजोर टोली हुन् । पाँच खेलपछि शीर्षस्थानमा रहन सफल भए नेपालले आठौंपटक यू१९ विश्पकप खेल्ने छ ।

नेपाल यू१९ टोलीले सन् २०१८ सेप्टेम्बरमा बंगलादेशमा भएको एसीसी एसिया कपपछि पहिलो अन्तर्राष्ट्रिय प्रतियोगिता खेल्न लागेको हो । जुन प्रतियोगितामा नेपालले ब्याटिङ बलियो बनाउन राष्ट्रिय टिमका रोहित कुमार पौडेललाई सिनियर टोलीबाट यू१९ टोलीमा लगिएकोे थियो । एसिया कप अघि नेपालले अगस्टमा भारतमा भारत यू-१९ को ए र बी तथा अफगानिस्तान यू-१९ सँग एकदिवसिय सिरिज पनि खेलेको थियो ।

हालसम्म नेपालले यू१९ विश्वकप ७ पटक खेलेको छ । सन् २००० मा श्रीलंकामा भएको यू१९ विश्वकपमा नेपालको पहिलो सहभागिता थियो । नेपालले त्यसपछि सन् २००० देखि २००८ सम्म लगातार पाँच पटक तथा सन् २०१२ र २०१६ मा यू १९ विश्वकप खेलेको थियो । नेपाली खेलाडी र ती खेलाडीको राष्ट्रिय र अन्तर्राष्ट्रिय प्रर्दशन हेर्दा नेपालले सन् २०२० को विश्वकपमा नेपाली झण्डा फरफराउने पक्का जस्तै देखिन्छ ।

नेपाललाई सधैं बाधक बन्दै आएको अफगानिस्तन यसपटक नहुँदा अझ सहज छ । विश्वकप खेल्नको लागि सबै खेलाडी मैदानमा जिम्जेवारका साथ भने खेल्न भने आवश्यक छ । नेपाली समर्थक र सुभचिन्तक पनि त्यसैकै प्रतिक्षामा छन् ।

नेपाली टोली : रोहित कुमार पौडेल(कप्तान), सन्दीप जोरा, भीम सार्की, राशिद खान, रित गौतम, सुर्य तामाङ, पवन सरार्फ, प्रतिस जिसी, अभिषेक बस्नेत, हरि बहादुर चौहान, कुशल मल्ल, सागर ढकाल, आशिफ शेख, कमलसिंह ऐरी ।