एजेन्सी – नेपाली लेग स्पिनर सन्दीप लामिछाने यतिबेला इन्डियन प्रिमियर लिग (आईपीएल) खेल्न दिल्लीमा व्यस्त छन् ।

दिल्ली क्यापिटल्सबाट आईपीएलमा प्रतिनिधित्व गरि रहेका सन्दीपले सुरुवाती ४ खेलमा औसत प्रर्दशन गरेका छन् । यसै क्रममा सन्दीपले १८ वर्षको उमेरमै टी२० क्रिकेटमा ५० विकेट पुरा गरेका छन् । सन्दीपले ४० टी ट्वान्टी एस खेलमा ५० विकेट पुरा गर्न सफल भएका हुन् ।

आइतबार बेलुका आईपीएलको २० औं खेलमा रोयल च्यालेन्जर्स बेंगलोरका मोइन अलीलाई आउट गर्दै सन्दीपले यो सफलता हात पारेका हुन् । सन्दीपले ५० विकेट पुरा गरेपछि दिल्ली क्यापिटल्ससँग कुरा गर्दै भने, ‘एक वर्षको क्रिकेट यात्रा उत्कृष्ट रह्यो । एक वर्षमा ५० विकेट लिनु अद्धभुत हो । अझैं लामो यात्रा तय गर्न बाँकी छ ।’

‘सम्रगमा मलाई लाग्छ बेंगलोरसँगको खेल राम्रो भयो । कागिसो रबाडाको प्रर्दशन उत्कृष्ट थियो । मेरो अन्तिम ओभर भने धेरै खराब रह्यो तर राम्रो सोचको आवश्यक छ । टिमको जितमा धेरै खुसी लागेको छ । प्लेअफ पुग्न हाम्रा लागि हरेक खेल महत्वपूर्ण छन्,’ सन्दीपले भने ।

सुरुवाती २ खेलमा बेन्चमा बसेका सन्दीपले जारी आईपीएलमा ४ खेलमा ५ विकेट लिएका छन् । दिल्लीले ६ खेलमा ३ मा जित र ३ मा हारका साथ ६ अंक जोड्दै अंक तालिकामा पाँचौ स्थानमा छ । दिल्लीले आफ्नो सातौं खेल आगमी १२ अप्रिलमा कोलकता नाइट राइर्डसँग खेल्ने छ ।