एन्जेसी – मिडिल अडरका ब्याट्सम्यान सुर्य कुमार यादवको अर्ध शतक र हार्दिक पान्ड्याले अन्तिमतिर आक्रमक ब्याटिङ गरेपछि इन्डियन प्रिमियर लिग (आईपीएल) को १५ औं खेलमा मुम्बई इन्डियन्सले चेन्नई सुपर किंग्सलाई १ सय ७१ रनको मध्यम लक्ष्य दिएको छ ।

घरेलु मैदान वानखडेमा टस हारेर ब्याटिङ थालेको मुम्बईले निर्धारित २० ओभरमा ५ विकेटको क्षतिमा १ सय ७० रन बनायो । मुम्बईलाई सम्मानजनक लक्ष्य सम्म पुर्याउन महत्वपूर्ण अर्धशतक प्रहार गरेका यादवले ४३ बलमा ८ चौका र १ छक्का प्रहार गर्दै ५९ रन जाडे । यादवलाई ठूलो शट खेल्न खोज्दा १८ ओभरको अन्तिम बलमा ड्वेन ब्राभोले रविन्द्र जडेजाबाट क्याच आउट गराए ।

कप्तान रोहित शर्मा १३,क्विन्टन डी कक र युवराज सिंह समान ४ रनमा आउट भएपछि दवावमा परेको मुम्बईलाई चौथो विकेटका लागि क्रुनाल पान्ड्या र यादवले विकेटको ६२ रनको साझेदारी गर्दै सम्मानजनक लक्ष्य सम्म पुर्याए । क्रुनालले ३२ बलमा ५ चौका र १ छक्का प्रहार गर्दै ४२ रन जोडे ।

हार्दिक पान्ड्या ८ बलमा ३ छक्का र १ चौका प्रहार गर्दै २५ रनमा अविजित रहे । किराण पोलार्ड ७ बलमा २ छक्का प्रहार गर्दै १७ रनमा अविजित रहे । अन्तिम दुई ओभरमा मुम्बईले ४५ रन जोडेपछि बलियो अवस्थामा पुगेको हो ।

अन्तिम ओभरमा ब्राभोलाई पोलार्डले तेस्रो बलमा छक्का,पान्ड्याले चौथो बलमा छक्का,पाँचौ बलमा चौका प्रहार र अन्तिम बलमा छक्का प्रहार गर्दै २९ रन बटुलेपछि मुम्बई बलियो अवस्थामा पुग्यो । चेन्नईका लागि मोहित शर्मा,इमरान ताहिर,रविन्द्र जडेजा,ड्वेन ब्राभो र दिपक चाहारले समान एक विकेट लिए ।