एजेन्सी –इन्डियन प्रिमियर लिग(आईपीएल) भारतका विभिन्न सहरमा जारी छ । आईपीएलका ८ फेन्चाईज टोली टोली मध्ये एक दिल्ली क्यापिटल्सले सुरुवाती दुई खेलमा १ मा जित र १ मा पराजित भएको छ ।

पहिलो खेलमा मुम्बईलाई ३७ रनले पराजित गरेको दिल्ली आफ्नो दोस्रो खेलमा चेन्नई सुपर किंग्ससँग ६ विकेटले पराजित हुन पुग्यो । दिल्लीले पहिलो खेलमा जित निकाल्दा ऋषभ पन्तले २७ बलमा ७८ रन जोडेका थिए । जुन खेलमा दिल्लीले २ सय १३ रन बनाउन सकेको थियो । दोस्रो खेलमा पन्त १३ बलमा २५ रनमा आउट भए । जुन खेलमा दिल्ली १ सय ४७ रनमा समेटियो ।

दोस्रो खेलको नतिजापछि दिल्लीका मुख्य प्रशिक्षक रिकी पोन्टिङले हरेक खेलमा ऋषभ पन्तले ठूलो इनिङ्स खेल्न नसक्ने हुनाले ओपनर शिखर धवनले आफ्नो जिम्मेवारी अनुसार खेल्नुपर्ने बताएका छन् ।

पोन्टिङले धवनलाई चेतावनी दिदै भनेका छन्, ‘धवनले आक्रमक रुपममा रन बनाउन आवश्यक छ । दोस्रो खेलमा अन्तिम ५ ओभरको ब्याटिङबाट म निराश छु । हामीले तीब्र गतिमा रन बनाउनुपर्ने थियो । सधैं पन्तले राम्रो खेल्छन् र ठूलो स्कोर बनाउछन् भन्ने हुँदैन । त्यसैले धवनले त्यहि अनुसार रन बनाउन सक्नुपर्छ ।’

दोस्रो खेलमा धवनले सुस्त गतिमा ४७ बलमा ५१ रन मात्र जोडेका थिए । दिल्लीले आफ्नो तेस्रो खेल शनिबार फिरिजो शाह कोटला मैदानमा कोलकता नाइट राइडर्ससँग खेल्ने छ । नेपाली लेग स्पिनर सन्दीप लामिछानेलाई सुरुवाती दुई खेलमा खेलमा बेन्चमा राखेको दिल्लीले कोलकतासँगको खेलमा मौका दिन सक्ने संभावना छ ।