एजेन्सी – श्रीलंका क्रिकेट बोर्डले तीव्र गतिका बलर तथा कप्तान लाथिस मलिङ्गालाई आईपीएलका सबै खेल खेल्न अनुमती दिएको छ । श्रीलंका क्रिकेटले ट्वीट गर्दै मलिङ्गालाई पुरै आईपीएल खेल्न अनुमती दिएको जनाएको छ ।

यस अघि श्रीलंका क्रिकेटले विश्वकपमा टिममा शामिल हुनका लागि त्योभन्दा पहिला खेलाडीहरुको घरेलु एकदिवसीय प्रतियोगिता अनिवार्य खेल्नु पर्ने बताएपछि मलिङ्गाले आईपीएलमा सुरुवाती ६ खेल गुमाउने आँकलन गरिएको थियो । भारतीय क्रिकेट कन्ट्रोल कोर्ड ( बिसिसिआई) को आग्रहमा श्रीलंका क्रिकेटले मलिङ्गालाई सबै आईपीएल खेल्न अनुमति दिएको भारतीय सञ्चार माध्यमहरुले जनाएका छन् ।

यसअघि घरेलु प्रतियोगिता अनिवार्य खेल्नुपर्ने बताएपछि राष्ट्रिय टोलीका कप्तान समेत रहेका मलिङ्गाले आफ्नो लागि विश्वकप ठूलो रहेको भन्दै आईपीएलको सुरुवाती ६ खेल नखेल्ने बताए थिए । मलिङ्गा मुम्बई इन्डियन्सबाट आईपीएल खेल्ने छन् । मलिङ्गाको अभावमा मुम्बईको पहिलो खेलमा बलिङ पनि केहि कमजोर देखिएको थियो । मुम्बईविरुद्ध दिल्लीले २ सय १३ रन बानाएको थियो । मुम्बई पहिलो खेलमा दिल्लीसँग ३७ रनले पराजित हुन पुग्यो ।

पहिलो खेलमा तीव्र गतिका बलर जसप्रित बुमराह घाईते भएको अवस्थामा श्रीलंका क्रिकेटको यो निर्णयले मुम्बईलाई ठूलो राहत मिल्ने छ । मुम्बई आफ्नो दोस्रो खेल विहिबार रोयल च्यालेन्जर्स बेंगलोरविरुद्ध खेल्ने छ । मलिङ्गा आईपीएलमा सर्वाधिक विकेट लिने खेलाडी समेत हुन् । मुम्बईले मलिङ्गालाई अक्सनमा २ करोड रुपैयाँ खर्चेर अनुबन्ध गरेको थियो ।