काठमाडौं (हाम्रो खेलकुद) – ब्रम्हास्मी कलेज समूह ‘ए’ को विजेता बन्दै राजधानीमा जारी टडिज प्लस टु टि–२० क्रिकेट लिगमा सेमिफाइनलमा प्रवेश गरेको छ ।

सोमबार मुलपानी क्रिकेट मैदानमा भएको अन्तिम लिग खेलमा ब्रम्हास्मीले बेलोर कलेजमाथि १ सय ५० रनको फराकिलो जित निकाल्दै समूह विजेताको रुपमा सेमिफाइनलमा स्थान बनाएको हो ।
२ सय ३९ रनको विशाल लक्ष्य पछ्याउने क्रममा बेलोर १५ ओभर ५ बलमा ८९ रनमा समेटियो । बेलोरका आकाश चन्दले २० रन र निकेश खत्रीले १४ रन जोडे । ब्रम्हास्मीका सुवास बिकले ३ तथा अजय बिक्रम अधिकारीले २ विकेट लिए ।

त्यसअघि टस जितेर ब्याटिङ गरेको ब्रम्हास्मीले निर्धारित २० ओभरमा ४ विकेट गुमाउँदै २ सय ३८ रनको विशाल योगफल तयार पारेको थियो । प्रतियोगिताकै उच्च स्कोर जोड्ने क्रममा ब्रम्हास्मीका विपिनविक्रम शाहीले ६० रन जोडे । आइस भट्टराईले ५० रनको तथा महेश रानाले ३२, अर्जुन गिरीले २५ र सुवास विकले ३१ रनको योगदान दिए । सुमन तिमिल्सिना, निकेश खत्री, बिबेक न्यौपाने र केशर हुमागाईले समान १–१ विकेट लिए ।

सोमबारै भएको अर्काे खेलमा गोल्डेनगेट कलेजले मोर्गन कलेज लाई ९४ रनले पराजित गरेको छ । १ सय ६५ रनको लक्ष्य पच्छया्उदै जवाफी ब्याटिङमा उत्रेको मोर्गन कलेजले २० ओभरमा सबै विकेट गुमाएर ७० रनमात्रै जोड्न सक्यो ।