एजेन्सी – साविक बिजेता चेन्नई सुपर किंग्सले ईन्डियन प्रिमियर लिग (आईपीएल) को १२ संस्करणमा विजयी सुरुवात गरेको छ ।

शनिवार राती सम्पन्न पहिलो खेलमै रोयल च्यालेन्जर्स बेंगलोरलाई ७ विकेटले पराजित गर्दै चेन्नईले विजयी सुरुवात गरेको हो । सामान्य ७१ रनको लक्ष्य चेन्नईले १७.४ ओभरमा ३ विकेटको क्षतिमा पुरा गर्यो । चेन्नईको जितमा ओपनर आम्बाती रायडूले ४२ बलमा २ चौका र १ छक्का प्रहार गर्दै २८ रनको योगदान दिए ।

अर्का ओपनर शेन वाटशन डक आउट हुँदा सुरेश रैनाले १९ रनको योगदान दिँदै आईपीएलमा ५ हजार रन पुरा गर्ने पहिलो ब्याट्सम्यान बने । त्यस्तै केदार जाधव १३ र रविन्द्र जडेजा ६ रनमा अविजित रहे । बेंगलोरका मोहम्मद सिराज, युजवेन्द्र चाहल र मोईन अलीले समान एक विकेट लिए ।

त्यसअघि चेन्नईमा टस हारेर पहिला ब्याटिङ थालेको बेंगलोर १७.१ ओभरमा अल आउट हुँदै ७० रनमा समेटिएको थियो । बेंगलोरका लागि ओपनर पार्थिप पटेलले सर्वाधिक २९ रन बनाउन बाहेक अन्य कुनैपनि ब्याट्सम्यानले दोहोरो अंकमा रन छुन सकेनन् । अर्थात बेंगलोरका १० ब्याट्सम्यानले दोहोरो अंकमा रन छुन सकेनन् । पटेलले ३५ बलमा २ चौका प्रहार गरे ।

हरभजन सिंहले चौथो ओभरको तेस्रो बलमा रविन्द्र जडेजाबाट क्याच गराउँदै कप्तान विराट कोहलीलाई ६ रनमा पेभिलिएन फर्काए । छैंटौ ओभरमा दोस्रो बलमा आफैं क्याच लिदै हरभजले मोईन अलीलाई ९ रनमा आउट गरे । हरभजनलेनै आठौं ओभरको दोस्रो बलमा जडेजाबाट एवी डी विलियर्सलाई ९ रनमा आउट गरेपछि बेंगलोर सस्तैमा आउट हुने संकेत देखाएको थियो । आठौं ओभरको अन्तिम बलमा शिम्ररोन हिटमायर डक आउट भएपछि बेंगलोर ३९–४ को कमजोर अवस्थामा पुग्यो । बेंगलोरको विकेट पतन निरन्तर जारी रह्यो ।

कोलन डी ग्राण्डहोम ४,शिवम दुबे र नन्दीप सैनी समान २,युजवेन्द्र चाहल ४,उमेश यादव १ रनमा अउट भए । हरभजनले बेंगलोरको टप अडर धरासयी बनाउँदा ताहिर र जडेजाले मिडिल तथा तल्लो क्रम निराश बनाए । चेन्नईका लागि इमरान ताहिरले ४ ओभरमा १ मेडन सहित ९ रन खर्चेर ३ विकेट लिए । हरवजनले ४ ओभरमा २० रन खर्चेर ३ विकेट लिदा रविन्द्र जडेजाले २ र ड्वेन ब्राभोको नाममा १ विकेट रह्यो । चेन्नईले दोस्रो खेलमा अव २६ मार्चमा दिल्ली क्यापिटल्ससँग प्रतिसप्रर्धा गर्दा बेंगलोरले मुम्बई इन्डियन्ससँग २८ मार्चमा खेल्ने छ ।