एजेन्सी – श्रीलंकासँगको तीन टी२० सिरिज घरेलु टोली दक्षिण अफ्रिकाले एक खेल अगावै जितेको छ । शुक्रबार राती भएको दोस्रो खेलमा १६ रनले पराजित गर्दै एक खेल अगावै सिरिज सब्जा गरेको हो ।

दक्षिण अफ्रिकाले प्रस्तुत गरेको १ सय ८१ रनको विजयी लक्ष्य पछ्याउने क्रममा श्रीलंकाले निर्धारित २० ओभरमा ९ विकेटको क्षतिमा १ सय ६४ रन मात्र बनाउन सक्यो । श्रीलंकाका इसुरु उडानाले ४८ बलमा ६ छक्का र ८ चौका प्रहार गर्दै ८४ रन जोडेपनि अन्य ब्याट्सम्यान नचल्दा श्रीलंकाको हार टर्न सकेन ।

निरोसन डिक्वेला २०, थिसेरा परेरा २२, एन्जिलो परेरा ११ र धनन्जय डी शिल्भाले १० रनमा आउट भए । अन्य कुनैपनि ब्याट्सम्यानले दोहोरो अंकमा रन जोड्न सकेनन् । अफ्रिकालागि क्रिस मोरिसले ३ तथा डेल स्टेन र तबरेज शाम्सीले समान २-२ विकेट लिए ।

त्यसअघि टस हारेर पहिला ब्याटिङ गरेको अफ्रिकाले निर्धारित २० ओभरमा ३ विकेटको क्षतिमा १ सय ८० रन बनाएको थियो । उसका लागि रस्सी भान डर डुसेनले ४४ बलमा ३ छक्का र ४ चौका प्रहार गर्दै ६४ रन बटुले । त्यस्तै रिजा हेन्ड्रिक्सले ४६ बलमा ९ चौका प्रहार गर्दै ६५, कप्तान जेपी ड्युमिनीले ३३ र डेविड मिलरले ९ रनको योगदान दिए ।

श्रीलंकाका लागि कप्तान लाथिस मलिङ्गा, इसुरु उडाना र अलिका धनञ्जयले समान एक विकेट हात पारे । यसअघि पहिलो टी २० खेलमा अफ्रिका सुपर ओभरमा विजयी भएको थियो । तेस्रो तथा अन्तिम टी२० खेल आईतबार हुने छ ।