एजेन्सी – श्रीलंकासँगको पाँच खेलको वान डे सिरिज घरेलु टोली दक्षिण अफ्रिकाले ५-० ले क्लिनस्विप गर्दै जितेको छ ।

शनिबार राती भएको पाँचौ तथा अन्तिम वान डे खेलमा डकवर्थ लेविस (डिएल) पद्दतिका आधारमा ४१ रनले विजयी भएसँगै अफ्रिकाले सिरिज क्लिनस्विप गर्न सफल भयो । २ सय २६ रनको लक्ष्य पक्ष्याउने क्रममा १ सय ३५ रन बनाउन २ विकेट गुमाउँदा खराब फ्लडलाइटका कारण खेल रोकिन पुगेको थियो ।

दक्षिण अफ्रिकाका लागि युवा ब्याट्सम्यान एडेन मार्करामले ७५ बलमा ७ चौका प्रहार गर्दै ६७ र रस्सी भान डर डुसेन २८ रनमा अविजित रहे । क्विन्टन डी कक ६ र कप्तान फाफ डु प्लेसिस २४ रनमा आउट भए । श्रीलंकाका लागि लाथिस मलिङ्गा र थिसेरा परेराले समान एक विकेट हात पारे ।

त्यसअघि कप टाउनमा टस जितेर पहिला ब्याटिङ थालेको श्रीलंकाले ४९.३ ओभरमा अल आउट हुँदै २ सय २५ रनमा समेटिएको थियो। श्रीलंकाका लागि कुशल मेन्डिसले ८४ बलमा ३ चौका प्रहार गर्दै सर्वाधिक ५६ रनको योगदान दिए । त्यस्तै एन्जिलो परेरा ३१,प्रियमल परेरा ३३,इसुरु उडना ३२ र ओशदा फ्रनान्डोले २२ रन जोड्न बाहेक अन्य कुनै पनि ब्याट्सम्यानले सम्झन योग्य प्रर्दशन गर्न सकेनन् ।

अफ्रिकाका लागि कागिसो रबाडाले ३,ईमरान ताहिरले र एनरोच नोर्टजले समान दुई दुई विकेट लिए । यसअघि दक्षिण अफ्रिका पहिलो खेलमा ८ विकेट,दोस्रो खेलमा १ सय १३ रन,तेस्रो खेलमा ७१ रन र चौथो खेलमा ६ विकेटले विजयी भएको थियो ।