एजेन्सी – नेपाली लेग स्पिनर सन्दीप लामिछानेले पाकिस्तान सुपर लिग (पिएसएल) अन्तर्गत सिजनको अन्तिम खेलमा मुल्तान सुल्तानसँग खराब प्रर्दशन गरेका छन् ।

समूह चरणको अन्तिम खेलमा सुल्तानले लाहोर कलन्दर्सलाई ७ विकेटले पराजित गरेको छ । १ सय ४१ रनको लक्ष्य पछ्याएको मुल्तानले १२.३ ओभरमा ३ विकेट गुमाउँदै सहज जित हात पार्यो । खराव प्रर्दशन गरेका सन्दीपले २.३ ओभरमा २८ रन खर्चिंदै कुनै विकेट लिन सकेनन् ।

सन्दीपले चौथो ओभरमा १३ रन खर्चिए जसमा ४ रन बाई सामेल थियो । नवौं ओभरको दोस्रो बलमा शन मसुदले चौका र पाँचौ र छैटौं बलमा जोनसन चाल्र्सले छक्का प्रहार गरेपछि महँगो सावित भए । यस ओभरमा उनले १८ रन खर्चिन पुगे । सुरुवाती ओभरमा खराब प्रर्दशन गरेका सन्दीपलाई कप्तान फकार जमानले सुल्तानलाई १ रन चाहिएको अवस्थामा १३ औं ओभरमा बलिङ गर्न लिएका थिए । पहिलो र दोस्रो बलमा डट गराएपनि तेस्रो बलमा १ रन लिदै अफ्रिदीले खेल जिताए ।

सुल्तानको सहज जितमा शन मशुदले २५ बलमा ८ चौका र १ छक्का प्रहार ४८ गर्दै रनमा आउट भए । जोनसन चाल्र्सले २५ बलमा ५ चौका र २ छक्का प्रहार गर्दै ४१ रनमा अविजित रहँदा उमर सिद्दीकले १३ र जेम्स भिन्सले २५ आउट भए । लाहोरका लागि डेविड विसा र शाहिन शाह अफ्रिदीले समान एक विकेट लिन बाहेक अन्य कुनै पनि बलरले विकेट लिन सकेनन् ।

त्यसअघि कराँचीमा टस हारेर ब्याटिङ गर्न मैदान उत्रेको लाहोरले निर्धारित २० ओभरमा ८ विकेटको क्षतिमा १ सय ४० रन बनायो । लाहोरका लागि कप्तान फकार जमानले ३६ बलमा ८ चौका र १ छक्का प्रहार गर्दै ५३ रन जोडे । त्यस्तै डेविड विसाले २२ बलमा समान २ चौका र छक्का प्रहार गर्दै ३० रन जोड्दा एलिसा गुणरत्नेले १२ रन जोड्न रहेक बाहेक अन्य कुनै पनि ब्याट्सम्यानले दोहोरो अंकमा रन जोड्न सकेनन् ।

हसन खान र ह्यारिस रउफ समान ६ रनमा अविजित रहे । मुल्तान सुल्तानका लागि मोहम्मद अब्बासले ३,शाहिद अफ्रिदीले दुई,क्रिस ग्रिन र मोहम्मद इलियासले समान एक विकेट हात पारे । सन्दीपले पिएसएलमा कुल ७ खेलमा ११ विकेट लिदै सर्वाधिक विकेट लिने खेलाडीको सुचिमा ५ औं स्थानमा रहँदै अन्त्य गरेका छन् ।