कराँची – क्यामरन डेलपोर्टको शतक र फहिम अशराफो ६ विकेटसँगै इस्लामबाद युनाइटेड पाकिस्तान सुपर लिग (पिएसएल) को प्ले अफमा पुगेको छ ।

शनिबार राती सम्पन्न खेलमा लाहोर कलन्दर्सलाई ४९ रनले पराजित गर्दै इस्लामावादले प्ले अफमा स्थान पक्का गरेको हो । २ सय ३९ रनको विशाल लक्ष्य पछ्याएको कलन्दर्सले २० ओभरमा ९ विकेटको क्षतिमा १ सय ८९ रन बनायो । उसका लागि सोहेल अख्तरले सर्वाधिक ७५ रन बनाए पनि टोलीको हार टार्न सकेनन् । अख्तरले ३४ बलमा ५ छक्का र ८ चौका प्रहार गर्दै हारको रन अन्तर घटाए ।

त्यस्तै ओपनर तथा कप्तान फकार जमानले २० बलमा ४ चौका र ३ छक्का प्रहार गर्दै ३८ रन जोडे । एनटोन डेभिच १८,डेविड विसा १२ र रिकी वेसल्स २० रनमा आउट भए । सन्दीपले ८ बलमा ६ रनमा अविजित रहे । घातक बलिङ गरेका फहिम अशराफले ४ ओभरमा १९ रन खर्चेर ६ विकेट लिए ।

त्यसअघि टस हारेर पहिला ब्याटिङ थालेको ईस्लामबादले २० ओभरमा ३ विकेटको क्षतिमा २ सय ३८ रन बनाएको थियो । ईस्लामबादलाई फराकिलो योगफल तयार पार्न क्यामरन डेलपोर्टले १ सय १७ रनको अविजित सानदार पाली खेले । क्यामरनले मात्र ६० बलमा ६ छक्का र १३ चौका प्रहार गरे । त्यस्तै चाडविक वाल्टनले ३० बलमा ४ छक्का २ चौका सहित ४८ रन जोडे ।

फिलिप साल्ट १० रनमा आउट हुँदा अन्तिमतिर आसिफ अलीले विश्फोटक ब्याटिङ गर्दै मात्र २१ बलमा ६ छक्का र ३ चौका प्रहार गर्दै ५५ रनमा नट आउट रहे । लाहोरका लागि डेविड विसा,शाहिन शाह अफ्रिदी र सन्दीप लामिछानले समान एक विकेट लिन बाहेक अन्य कुनै पनि बलरले विकेट लिन सकेनन् । खराव प्रर्दशन गरेका सन्दीपले ४ ओभरमा ४६ रन खर्चेर १ विकेट लिए ।

यो जितसँगै ईस्लामबाद १० खेलबाट समान पाँचमा जित र हारका साथ १० अंक जोड्दै प्ले अफमा पुगेको छ । ९ खेलबाट ६ मा हार र ३ मा जितका साथ पाँचौ स्थानमा रहेको लाहोरको अघिल्लो चरणको संभावना लगभग सकिएको छ । झिनो अंक अगणितीय संभावना बाँकी रहेको लाहोरले अन्तिम खेलमा मुल्तान सुल्तानलाई फराकिलो अन्तरले पराजित गर्न सके र कराँची किंग्सले बाँकी दुबै खेल फराकिलो अन्तरले हारेको खण्डमा नेट रन रेटका आधारमा नाटकीय रुपमा प्ले अफ प्रवेश गर्ने छ । लाहोरले सुल्तानसँग सोमबार खेल्ने छ ।