काठमाडौं (हाम्रो खेलकुद) – आठौं राष्ट्रिय खेलकुदको क्रिकेट अन्तर्गत प्रदेश ३ स्तरीय छनोट प्रतियोगितामा शुक्रबार दिउँसो ललितपुरले काभ्रेपालाञ्चोकलाई ६ विकेटको पराजित गरेको छ ।

टियू क्रिकेट मैदानमा काभ्रेले दिएको १ सय १८ रनको लक्ष्य ललितपुरले ९ बल अगाडी ४ विकेट गुमाउँदै पुरा गर्यो । ललितपुरको सहज जितमा भरत इन्द्रले ४२, आदिल खान ३३ र विवेक रानामगरले १७ रनको योगदान दिए । रित गौतम ४, दुर्गेश थापा ३ र विश्वास श्रेष्ठले १ रन बटुले । काभ्रेका लागि मनिष सुवेदीले २, सुमन हुमागाईं र सोनु तामाङले समान एक-एक विकेट लिएपनि जितको लागि पर्याप्त रहेन ।

त्यसअघि टस जितेर पहिला ब्याटिङ थालेको काभ्रेले निर्धारित २० ओभरमा ५ विकेटको क्षतिमा १ सय १७ रन बनाएको थियो । काभ्रेका लागि सोनु तामाङले २८ बलमा ५ चौका र ३ छक्का प्रहार गर्दै ५२ रन बनाए । प्रविन रिजाल १३ र धिरज अधिकारीले २६ रन बनाउन बाहेक अन्यले राम्रो प्रर्दशन गर्न सकेनन् । ललितपुरका प्रकाश विष्ट, सुमित झा, सुर्य तामाङ र आदिल खानले समान एक-एक विकेट लिए ।

फागुन २२ देखी सुरु भएको प्रदेश ३ स्तरिय छनोट प्रतियोगितामा समुह ‘ए’ मा काठमाडौं, चितवन, नुवाकोट र भक्तपुर रहँदा समुह ‘बी’ मा मकवानपुर, काभ्रेपाञ्चोक र ललितपुर छन् । समुह ‘ए’ र ‘बी’ बाट शिर्ष दुई दुई टोली सेमिफाइनल प्रवेश गर्ने छन् । सेमिफाइनल खेल फागुन २७ गते हुने छ । फाइनल खेल फागुन २८ गते हुने छ ।