काठमाडौं (हाम्रो खेलकुद) – क्रिकेट खेलाडी संघ नेपाल (सिप्यान) को आयोजनामा हुने एनसिसिएस–सिप्यान क्रिकेट अवार्ड आज राजधानीमा हुँदैछ । कार्यक्रम कमलपोखरीस्थित रसियन कल्चर सेन्टरमा दिउँसो १:३० बजे सुरु हुनेछ ।

सिप्यानले आइतबार राजधानीमा पत्रकार सम्मेलनको आयोजना गरेर अवार्डको तीन विधा वर्ष क्रिकेट खेलाडी पुरुष, वर्ष क्रिकेट खेलाडी महिला र वर्ष उदियमान खेलाडीको मनोनयन सार्वजनिक गरेको थियो । त्यसअघि नै सार्वजनिक मतदानका आधारमा विजेता घोषित हुने अवधारणामा वर्षको उत्कृष्ट क्रिकेट क्षणका लागि १० क्षण मनोनयनमा परेका थिए । यसबाहेक लाइफटाइम एचिभमेन्ट अवार्डबाट एक जना सम्मानित हुनेछन् ।

वर्ष क्रिकेट खेलाडी पुरुषमा कप्तान पारस खड्कासँगै युवा लेग स्पिनर सन्दीप लामिछाने मनोनयनमा परेका छन् । यस्तै दीपेन्द्रसिंह ऐरी, करण केसी र सोमपाल कामी पनि मनोनयनमा परेका छन् । मनोनयनमा परेका खेलाडीहरु अघिल्लो वर्षदेखि युएईविरुद्धको सिरिजमा गरेको प्रदर्शनका आधारमा खेलाडी छनोट गरेको सिप्यानले जनाएको छ ।

यस्तै वर्ष क्रिकेट खेलाडी महिलामा कप्तान रुविना क्षेत्री बेलबसेसँगै करुणा भन्डारी, इन्दु बर्मा, सीता रानामगर र सरिता मगरबीच प्रतिस्पर्धा हुनेछ । पछिल्लो महिना थाइल्यान्डमा भएको महिला टी–२० स्म्यासमा गरेको प्रदर्शनका आधारमा छनोट गरिएको आयोजकले जनाएको छ । यस्तै उदियमान वर्ष खेलाडीमा अभिनास बोहोरा, ललितनारायण राजवंशी, रोहित कुमार पौडेल र सन्दीप जोरासँगै महिलाबाट कविता कुँवर मनोनयनमा परेका छन् ।

तीन विधाको अवार्डको लागि ७ सदस्यीय प्राविधिक समिति गठन गरि उनीहरुले योग्य खेलाडी छनोट गरेको सिप्यानले जनाएको छ । प्राविधिक समितिमा पुरुष राष्ट्रिय टोलीका मुख्य प्रशिक्षक जगत टमाटा, ,महिला टोलीका प्रशिक्षक विनोद दास, अम्पायरद्वय विनय कुमार झा र दुर्गानाथ सुवेदी (देवेन्द्र), खेल पत्रकारद्वय सरिता श्रेष्ठ र सुबास हुमागाईसँगै प्राविधिक को–अर्डिनेटरमा नेपाली क्रिकेट टिमका व्यवस्थापक तथा टेक्निकल एनलिस्ट रमन शिवाकोटी रहेका छन् ।