काठमाडौं (हाम्रो खेलकुद) – युवा स्पिनर सन्दीप लामिछानेले पाकिस्तान सुपर लिग (पीएसएल) अन्तर्गत बिहीबार कराची किंग्सविरुद्ध खेलमा उत्कृष्ट बलिङ प्रदर्शनलाई निरन्तरता दिएका छन् । सन्दीपले कसिलो बलिङ गरेपनि कराची ५ विकेटले विजयी रहयो ।

पहिलो ब्याटिङ गरेको लाहोरले निर्धारित २० ओभरमा ५ विकेटको क्षतिमा १ सय ३३ रन जोडेको थियो । एबी डी भिलियर्सले ३३, सोहेल अख्तरले नटआउट २९, कोरी एन्डरसनले २२ तथा हरिस सोहेलले २० रन जोड्नुबाहेक अन्य ब्याट्सम्यानले उल्लेख्य योगदान दिएनन् । कराचीका इफ्तिखार अहमदले २ तथा इमाद वासिम, मोहमद आमिर र उमेर खानले १-१ विकेट हात पारे ।

जवाफमा सन्दीपले तेस्रो ओभरमा नै ओपनर कोलिन मुनरोलाई आउट गरे । आफ्नो पहिलो ओभरको अन्तिम बलमा उनले मुनरोलाई क्याच आउट गराए । पहिलो ओभरमा २ रन खर्चेका सन्दीपले दोस्रो ओभरमा अर्का ओपनर बाबर आजमलाई बोल्ड गरे । उनले त्यस ओभरमा पनि १ रनमात्र दिँदै लाहोरलाई बलियो स्थितिमा ल्याए ।

सन्दीपले त्यसपछि सातौं ओभरमा ६ रन र दशौं ओभरमा ८ रन खर्चेका थिए । अन्य बलरहरुले राम्रो साथ दिन नसक्दा लाहोर पराजित हुन पुग्यो । कराचीले अन्तिम ओभरमा ५ विकेटको नोक्सानीमा लक्ष्य पूरा गरेको थियो । कराचीका लागि लियाम लिभिङस्टोनले ३८ रनको योगदान दिए । इफ्तिखार अहमद ३३ रनमा नटआउट रहे । लाहिरका डेविड विसा र हरिस राउफले १-१ विकेट लिए ।

यस हारसँगै सन्दीपको टोली अंक तालिकामा तल झरेको छ । ७ खेलमा ३ जित र ४ हारसहित लाहोर चौथो स्थानमा छ । पेशावर जाल्मी, क्वेटा ग्ल्याडीयटर्स र इस्लामावाद युनाइटेडको समान ८-८ अंक छ ।